Sorumutu Konsellu Ministru nian iha loron 6 fulan Agostu tinan 2013
Prezidénsia Konsellu Ministrus
V Governu Konstitusionál
..............................................................................................................................
Díli, Loron 6 Fulan Agostu Tinan 2013
Komunikadu Imprensa
Sorumutu Konsellu Ministru nian iha loron 6 fulan Agostu tinan 2013
Governu Konstitusional da-V hala’o sorumutu ida iha loron 6 fulan Agostu tinan 2013, iha sala sorumutu Konsellu Ministrus nian, iha Palásiu Governu, iha Dili, no aprova tiha ona:
1. Proposta-lei kona-ba Lei Imprensa
Sekretáriu Estadu Komunikasaun Sosiál hato’o ohin ba iha Konsellu Ministrus Proposta kona-ba Lei Imprensa nian. Lei ida ne’e atu defende direitu sidadaun nian ba hala’o liberdade espresaun no liberdade hanoin nian no mós atu ema profisionál informasaun nian sira bele hetan garantia ida kona-ba segredu profisionál no atu hetan protesaun ba ninia indepenénsia.
Lei Imprensa ne’e hakarak atu asegura liberdade imprensa no mós atu promove ekelíbriu ida ne’ebé presiza entre hala’o liberdade fundamentál ne’e, ho direitu no valór hirak seluk ne’ebé mak prevee ona iha Konstituisaun. Ninia objektivu mak fundamentál liu, atu regula aktividde ema profisionál sira nian ne’ebé mak preparadu ona no iha responsabilidade tuir étika, atu nune’e sira bele sira bele fó informasaun ba públiku loloos no imparsiál no atu fó aten brani ba ema hodi hala’o ninia sidadania ida ativa no esklaresida hosi parte populasaun nian, hodi nune’e kontribui ba sosiedade ida demokrátika.
Proposta kona-ba Lei Imprensa nian aprova ona hosi Konsellu Ministrus no sei submete ba aprovasaun, iha Parlamentu Nasionál.
2. Rezolusaun ne’ebé aprova Matadalan ba Implementasaun Programa Empregu Rurál nian (PER)
Konsellu Ministrus aprova tiha ona Rezolusaun ida ne’ebé mak aprova Matadalan ba Implementasaun Programa Empregu Rurál (PER) nian ne’ebé mak aprezenta husi Sekretaria Estadu ba Polítika Formasaun Profisionál no Empregu (SEPFOPE).
PER ne’e, SEPFOPE mak sei implementa ho objektivu ida atu kria postu traballu iha área rurál sira no destinadu atu finansia reabilitasaun no manutensaun infra-estrutura lokál nian sira liu hosi rekursu ba empreza no maundobra lokál nian sira.
Iha Matadalan ba Implementasaun PER nia laran ita bele hetan konjuntu regra sira atu uza transferénsia públika ne’ebé Orsamentu Jerál Estadu nian ba 2013 fo ba iha SEPFOPE, no destinada ba Programa Empregu Rurál.
Konsellu Ministru mós analiza ona:
1. Dekretu-Lei ne’ebé mak aprova Alterasaun Dahuluk ba Dekretu-Lei ne’ebé Aprova Estatutu Karreira Dosente Univeritária nian
Ministériu Edukasaun aprezenta ona proposta ida ba proposta ne’ebé mak altera ba dahuluk Dekretu-Lei no. 7/2012, loron 15 Fevereiru, kona-ba Estatutu Karreira Dosente Universitária nian no ida ne’e sei hato’o fali ba Konsellu Ministru iha sorumutu oin mai hodi bele hetan aprovasaun.
