Governu Timor-Leste

Governu Konstituisionál V, liuhosi Ministériu Turizmu, iha loron 26, fulan Maiu, “organiza eventu Karavana Artístika ho ninia tema “Loron Aban Hahú Ohin”. Karavana ne’e rasik hahú hosi Tasi-Tolu no termina hodi konsentra iha resintu Palásiu Governu nian, iha Díli.

Objetivu hosi eventu ne’e, aleinde komemora loron Restaurasaun Independénsia Timor-Leste ba dasanuluk-resin-ida, 20  Maiu 2013, atu promove mós talentu juventude sira nian hodi patisipa iha prosesu dezenvolvimentu Timor-Leste, liuliu iha setór kulturál no mós hanesan meiu ida atu atrai mundu internasionál hodi mai vizita iha nasaun foun ida ne’e.

“Ha’u konsidera atividade ne’e importante tébes, tanba bele kontribui ba dezenvolvimentu no bele atrai atensaun husi turista  hodi bele mai vizita Timor-Leste, nune’e mós bele ajuda aumenta reseitas nasaun nian”, hateten Primeira Dama Isabel Ferreira, bainhira halo abertura ba eventu ne’e.

“Hau kontente bainhira haree partisipasaun husi sidadaun hotu, sosiedade sivíl, instituisaun Governu  no embaixada sira ne’ebé ho antuziazmu  partisipa  iha eventu ne’e, nu’udar biban ida atu promove kreatividade artístika ba dezenvolvimentu turístiku iha rai laran no mós ba foin sa’e sira atu bele espresa valór artístiku no espíritu voluntáriu, solidariedade no toleránsia.”, tenik Isabel Ferreira.

Nu’udar manan na’in husi kategoria kultura orijinál, primeiru lugar okupa hosi distritu Vikeke, segundu lugar husi distritu Manatutu no terseiru lugar hosi distritu Bobonaru, entretantu ba kategoria kultura modernu primeiru lugar mak grupu Santo António, segundu lugar ETDA, terseiru lugar  mak okupa husi Milenium Timor.

Marka prezensa iha eventu ne’e, Primeiru-Ministru, Kay Rala Xanana Gusmão, Primeira Dama, Isabel da Costa Ferreira, Membru Governu, Membru Parlamentu Nasionál, reprezentante husi Ministériu sira, reprezentante husi distritu 13, Embaixada Indonézia, komunidade xineza iha Timor-Leste, Asosiasaun Motosikleta Harley Davidson hosi Indonézia no Automobilismo JEEP Timor-Leste.