Selebrasaun Loron Internasionál Lian-Inan
Ministériu Edukasaun ho UNESCO, iha loron 21 fulan Fevereiru tinan 2013, selebra Loron Internasionál Lian-Inan ho tema “Prezerva lian-inan liuhusi livru” iha salaun Delta Nova, Díli.
Ministru Edukasaun, Bendito Freitas, dehan “hanesan país ida independente, ita mós tenke promove valór patrimóniu kulturál sira. Dala ruma ita-nia polítika atu defende no proteje valór kulturál sira no ita labele haluha katak Lian-Inan nu’udar parte husi ita-nia identidade no hanesan lian ida, ne’ebé estabelese kontaktu dahuluk ho ita-nia ezisténsia hanesan ser umanu ho komunidade to’o ita tama iha sosiedade nia laran no tama ba mundu ho koñesimentu ne’ebé mak kompleksu.
Ministru mós hatutan “Ministériu Edukasaun fó apoiu teb-tebes kona-ba uzu Lian-inan atu sai hanesan ponte ida hodi fasilita primeiru anu eskolaridade, liuliu iha nivél pré eskolár no ensinu báziku, nune’e bele tau ona fundamentu ida forte atu sira prosege estudu iha nívél superiór sira ho fundamentu ida ne’ebé mós di’ak
Iha fatin hanesan, Primeiru-Ministru Kay Rala Xanana Gusmão, “hateten uza Lian-inan iha edukasaun atu fasilita kompriensaun hosi labarik sira-nia hanoin no ko’alia ne’e ba iha objetu no bele ba iha konseitu ida iha literasia ho numerasia nian. Ha’u defende Lian-inan tanba, ita-nia riku, atu hatudu ba mundu ita mak ne’e”.
Marka prezensa iha selebrasaun Loron Internasionál Lian-Inan mak hanesan, Primeiru-Ministru, Kay Rala Xanana Gusmão; Ministru Edukasaun, Bendito Freitas; Vise-Ministra ba Ensinu Báziku, Dulce Soares; Ministra Solidariedade Sosiál, Isabel Guterres; Sekterária Estadu Arte no Kultura, Isabel de Jesus Ximenes, Prezidente Komisaun F, Parlamentu Nasionál, ONG Nasionál no Internasionál sira, Parseiru Relijioza, Sindikatu Profesór sira, Reprezentante husi Lian-Inan, Reprezentante UNESCO no alunu sira hosi Embli Rembor.
