Timor-Leste Simu Medalla Pás iha Asaun Sri Chinmoy
Timor-Leste liuhosi Primeiru-Ministru, Kay Rala Xanana Gusmão ho eis Primeiru-Ministru no Sekretáriu Jerál partidu FRETILIN nian, Marí Alkatiri, simu Medalla Pás iha Asaun Sri Chinmoy nian, iha loron 8, fulan Fevereiru, tinan 2013, iha serimónia inaugurasaun estátua Sri Chinmoy (filosofo indiano ida, ne’ebé mate iha tinan 2007) iha uma fukun Parlamentu Nasionál (PN).
Primeiru-Ministru, Kay Rala Xanana Gusmão, iha nia diskursu hateten, ho ksolok iha serimónia espesiál ne’ebé aprezenta ba ita tomak, buat ne’e ita bolu dehan Peace In Action Of Sri Chinmoy: “ita selebra nia vida tomak ho ninia kontribuisaun atu promove pás no mós atu dehan katak, umanidade ita hotu hamutuk forma ema ida de’it, hanoin ida de’it no tenke hakarak ida de’it.
Ha’u sente ónra boot tebetebes atu simu medalla ida ne’e, ónra no responsabilidade atu kuda nafatin dame ho domin iha ita-nia rain. Ha’u fiar katak ita hotu mehi rai ida ne’ebé estável no ita halakon tiha buat hotu ne’ebé haketak ita atu hateke hamutuk, hadi’a rai ida ne’e no povu nia móris”, tenik Primeiru-Ministru.
Iha fatin hanesan Sekretáriu Jerál Partidu Fretilin, Marí Alkatiri hateten “ita hotu hatene valór pás nian, dala barak tanba ninia valór ne’e ás tébes ita atu sosa mós la hetan, ita tenke halo esforsu lor-loron hodi bele iha kapasidade atu hanoin, iha kapasidade atu muda ita-nia hahalok atu ita bele sosa pás. Maibé pás ha’u hakarak sosa duni, ita tenki harii pás lor-loron hahú hosi ita-nia neon, hahalok rasik, pás iha ita-nia fuan, ita-nia hanoin mak importante liu. Ha’u hanoin ezemplu ida dala barak ema husu tanba saida mak ita lori estátua ema ida ké povu Timor-Leste seidauk koñese, maibé sei koñese tanba ita atu hatudu de’it pás ne’e mai hosi esforsu ema bar-barak iha mundu, ita tenke fó valór ba buat ida ne’e”, dehan Alkatiri.
Marka prezensa iha seremónia ne’e Xefe Estadu nian, Taur Matan Ruak ho Primeira Dama, Isabel da Costa Fereira, Prezidente Parlamentu Nasionál, Vicente Guterres, Membru Parlamentu Nasionál, Membru Governu sira, Korpu Diplomátiku no eis titulár sira hotu.
