Governu organiza kuda ai-oan iha Likisá
Iha loron, 30 fulan Janeiru, Sekretaria Estadu Meiu Ambiente (SEMA) no Sekretaria Estadu Floresta no Konservasaun Natureza (SEFKN), hamutuk ho Universidade da Páz (UNPAZ), organiza kuda ai-oan, iha foho tutun Pilila, distritu Likisá.
Objetivu hosi kuda ai-oan ne’e, atu fó hanoin no fó edukasaun sívika ba estudante no foin sa’e sira, oinsá atu proteje ambiente bainhira udan.
“Atividade kuda ai-oan ne’e importante tébes no bele mós sai hanesan edukasaun sívika ida ba foin-sa’e no estudante sira atu proteje nafatin ambiente, tanba distritu Likisá fatin ne’ebé iha risku maka’as ba dezastre naturál iha tempu udan, tanba ne’e, husu ba ita hotu-hotu atu iha responsabilidade ba ambiente, proteje ai-horis ne’ebé iha ita nia leet,” tenik Seretáriu Estadu Meiu Ambiente.
Marka prezensa iha kuda ai-oan ne’e, Sekretáriu Estadu Meiu Ambiente, Nominando Soares; Sekretáriu Estadu Floresta no Konservasaun Natureza, João Cardoso Fernandes; Reitór UNPAZ, Lucas da Costa, no estudante UNPAZ sira hotu.
