Komemorasaun tinan 10 Santuáriu Nasionál Na’in Feto Aitára
Vise Primeiru-Ministru, Fernando La Sama de Araújo partisipa iha komemorasaun tinan sanulu, Santuáriu Nasionál Na’in Feto Aitára iha sub-distritu Soibada, distritu Manatutu durante loron tolu, hahú 12-14 fulan Outubru.
Iha komemorasaun ne’e, Vise Primeiru-Ministru hateten: “ida ne’e hanesan ba dahuluk ha’u tuir Peregrinasaun iha Santuáriu Nasionál Na’in Feto Aitára Soibada, ha’u sente katak ida ne’e halo klean liután ema nia fee hodi hanoin buat di’ak no pozitivu tuir doutrina kristaun ninian.
Iha fatin hanesan Prezidente Repúblika, Taur Matan Ruak hateten katak fatin ida ne’e, aban bai rua sei sai fatin ida ne’ebé Timor oan hotu iha Timor-laran tomak bele mai halibur hodi tinan-tinan habot sira nia fi’ar, maibé la’ós de’it ida ne’e timor-oan sira mós hakarak iha Lei ida hodi transforma fatin ida ne’e, nu’udar mós fatin ida di’ak iha sudeste Aziátiku.
Nune’e mós, Amo Bispu Dom Noberto Do Amaral, Iha Nia Homilia ba Selebrasaun tinan 10 Santuáriu Nasionál Na’in Feto Aitára katak, ho tema “’Tinan Fiar Nian” hatudu ba ita hotu katak, ita tenke fi’ar ba Maromak. Ne’eduni, ho tinan fiar nian ida ne’e monu duni ba ita nia aan, monu duni ba Timor-Leste atu ita hotu-hotu buka haree fila fali ita nia fiar hodi hatetu didi’ak no hametin ba”, Esplika Amo Bispo Deocese Maliana ne’e.
Partisipa komemorasaun Santuáriu Nasionál Na’in Feto Aitára ba tinan sanulu nian mak, Amo Bispo Dom Ricardo, Dom Noberto Amaral, Prezidente Repúblika, Taur Matan Ruak, Vise Primeiru-Ministru Fernando La Sama de Araújo, Sekretáriu Estadu Água, Saneamentu no Urbanizasaun, Elias Moniz, Sekretariu Estadu Desentralizasaun Administrativa Tomás Cabral.
