Governu Timor-Leste

Primeiru-Ministru, kay Rala Xanana Gusmão, iha Sesta-feira, loron 27 fulan Abril tinan 2012, inaugura Estádiu Munisipál no Jináziu Díli.

Seremónia ne’e hahú uluk ho inspesaun ba estádiu hosi Primeiru-Ministru ho Membru Governu sira, hafoin asina akta no entrega xave hosi kompañia Fitun Di’ak no Mondias ba Governu, tuir kedas asina plaka ba fatin rua ne’e hosi Primeiru-Ministru Kay Rala Xanana Gusmão no Sekretáriu Estadu Joventude no Desportu Miguel Manetelo.

Sekretáriu Estadu Miguel Manetelo, esplika katak “rekonstrusaun ne’e iha faze rua, faze dahuluk ho orsamentu tinan 2011 no faze daruak ho orsamentu tinan 2012 nian.

Manetelo mós hatutan tan, ha’u atu espresa de’it ami nia sentimentu no orgullu liuliu ba Sua Exelénsia Primeiru-Ministru tanba iha situasaun ne’ebé defísil, nu’udar Sekretáriu Estadu,  sempre ba husu apoiu bebeik, oinsá atu finaliza estádiu ida ne’e, ba kompañia Fitun Diák, ne’ebé hadi’a kampu ida ne’e no Mondias ne’ebé hadi’a  jináziu,   ha’u agradese ba sira hanesan Timoroan, sira hatudu duni kualidade no kapasidade ne’ebé iha hodi hetan konfiansa, ba futuru  ita bele la’o hamutuk hodi dezenvolve ita nia rai.

Iha bibán ida ne’e, Sekretáriu Estadu mós agradese ba média komunikasaun sosiál sira ne’ebé hahú kedas hosi aprovasaun orsamentu to’o ohin loron, iha krítika barak ba prosesu rekonstrusaun no reabilitasaun maibé krítika sira ne’e  ba Governu liuliu ba SEJD hanesan motivasaun ida hodi bele hadi’a di’ak liután servisu ne’ebé iha hodi bele fasilita ita nia joven sira atu espresa sira nia talentu.

Hafoin inagurasaun hahú kedas ho jogu futeból entre Membru Governu  ho Veteranu sira, nomós atividade atletizmu korrida metru 100 hosi atleta júnior sira, hosi “Klube 30 de Agostu” nian no korrida metru 400, ba atleta sira hosi federasaun atletizmu Timor-Leste, hanesan preparasaun atu halo selesaun ba olimpíade iha Londres.