MED no GNR sira asina Memorandu Entendimentu ida
Ministériu Ekonomia no Dezenvolvimentu no Subagrupamento Bravo Guarda Nacional Republicana (GNR) Portugal nian asina Memorandu Entendimentu ida iha loron 1 fulan Marsu iha Kuartel GNR nian, atu implementa "projetu-pilotu" foun hodi halo kapasitasaun no formasaun ba kuadru tékniku sira.
Memorandu Entendimentu ida-ne’e ho objetivu atu dezenvolve “projetu-pilotu ida” kona-ba kooperasaun iha área kapasitasaun profisiónal no kriasaun mikro-negósiu nian ka kooperativa, atu nune’e bele envolve populasaun joven timoroan sira, no promove iha parte negósiu nian, hamenus ki’ak, iha tempu hanesan hodi kontribui ba dezenvolvimentu ekonókmiku sustentável.
“Projetu-pilotu ida ne’e” atu kapasita formandu sira Sentru Profisionál Tibar nian, maske seidauk iha asesu ba servisu, atuhodi fó kapasitasaun téknika espesializada iha área karpintaria, eletrisidade, mekánika, kanalizasaun, no sira seluk tan, atu nune’e bele fasilita sira tama ba iha merkadu traballu nian.
Sentru Nasionál ba Empregu no Formasaun Profisionál, hosi Sekretaria Estadu Formasaun Profisionál no Empregu, sei hatudu estajiáriu sira ne’ebé mak tenke frekuenta estájiu ho objetivu atu promove kapasitasaun joven sira nian iha área esensiál sira ba ekonomia sustentável ne’ebé agora daudauk presiza tebes.
Guarda Nasionál Republikana, fó ofisina no koñesimentu kona-ba nia métodu ka téknika sira atu promove kapasitasaun téknika ba jóven timoroan sira, hodi halo sira bele hatama-an ba iha sosiedade laran.
Memorandu Entendimentu ne’e asina hosi Ministru Ekonomia no Dezenvolvimentu, João Mendes Gonçalves, no Kapitaun João Almeida Martinho husi Subagrupamento Bravo GNR nian.
