“Iha Timor-Leste iha liberdade imprensa”
“Iha Timor-Leste iha liberdade imprensa, tanba realidade iha Timor-Leste laiha intervensaun hosi Estadu ba servisu média sira nian”, deklara Avelino Coelho, Sekretáriu Estadu Polítika Enerjétika, bainhira taka workshop ba editór no jornalista sira, iha kuarta-feira, loron 22 fulan Fevereiru, iha Ótel excelsior Resosrt, Díli.
Avelino Coelho hatutan tan, “liu hosi workshop loron tolu ne’e, bele hasa’e kbi’it no aumenta esperiénsia jornalista sira nian hodi kontribui ba prosesu dezenvolvimentu nasionál”.
Diretór-Jerál Sekretaria Estadu Konsellu Ministru (SEKM), Victor Maia, iha nia intervensaun agradese ba partisipasaun hosi jornalista sira nian iha workshop ne’e, durante loron tolu nia laran ho dedikasaun iha fatin ida ne’e, hodi simu koñesimentu lubun ida ne’ebé oradór internasionál (Indonesia no Filipina) no nasionál sira fó, hodi aproveita ba moris lorloron hanesan jornalista no editór, atu aumenta tan iha vida profisionál nian.
Eis Prezindente Konsellu Imprensa Indonézia nian, Atmakusuma Astraatmadja nu’udar reprezentante ba oradór internasionál sira, iha nianian intervensaun ba iha sesaun enseramentu workshop, hateten “Interesante tebe-tebes halo diskusaun ho jornalista sira iha Timor-Leste, problema no dezafiu sira ne’ebé jornalista sira iha Timor-Leste enfrenta, la dook hosi problema sira ne’ebé jornalista sira iha Indonésia enfrenta mós, ne’eduni ho esperiénsia ne’ebé fahe ba malu durante loron tolu iha workshop ne’e, bele kontribui atu hadi’a diak liután servisu jornalista nian”.
José Fransisco Efi, reprezenta Rádiu Komunidade sira, hato’o sira nia apresiasaun no fó agradese tebes ba SEKM “tanba fasilita ona jornalista sira hodi hasa’e tan kapasidade liu hosi matéria sira ne’ebé mak oradór internasionál no nasionál sira aprezenta. Aleinde ne’e ami husu nafatin atu Sekretaria Estadu Konsellu Ministru, bele fasilita hodi kria lalais Lei ba Imprensa no hari’i lalais Konsellu Imprensa ida iha Timor-Leste, atu bele fasilita rezolve problema ne’ebé jornalista sira hasoru”.
Domingos Saldanha hosi Jornál STL, reprezenta jornalista sira hotu, afirma, “aprende buat ida la sukat tempu, idade no hanoin, maibé kuandu hakarak aprende tenke aprende ba bebeik, tan ne’e ami husu ba Sekretaria Estadu Konsellu Ministru atu workshop sira hanesan ne’e, tenke hala’o bebeik, iha tinan ida dala tolu ka dala haat hanesan ne’e”.
Serimónia enseramentu ne’e konta ho atribuisaun sertifikadu ba jornalista sira hamutuk ema na’in 76, hosi klase jornalista no klase editór.
