Governu Timor-Leste

Timor-Leste nu’udar líder ba nasaun frájil ne’ebé hamahon-an iha g7+, iha inisiativa atu halibur membru g7+ husi nasaun 19 iha sorumutu ho tema “Forward Looking Planning Session” sei hala’o iha loron 25 to’o loron 28 Janeiru, iha Ministériu Finansa.

Objetivu Sorumutu ida ne’e hodi diskuti kona-ba planu dezenvolvimentu operasionál  New Deal nian iha 2012 liu-liu oinsá atu konsolida servisu g7+ nian kona-ba Objetivu Harii Pás no Harii Estadu,  dezenvolve indikadór no estratéjia sira hodi lori PSGs (Peace Building and State Building Goals) ba iha Asembleia Jerál ONU nian ba dala-67 ne’ebé sei hala’o iha New York fulan Setembru 2012, hodi adopta New Deal ne’e hanesan rezolusaun ida. Ho nune’e nasaun g7+ sira bele alkansa objetivu Dezenvolvimentu Milénium ka MDGs (Millennium Development Goals).

Liuhusi sorumutu ida ne’e, grupu g7+ sei forma grupu traballu rua hodi haree ba sosializasaun ba komunidade internasionál no substánsia kona-ba definisaun Spektrum Frájilidade no implementasaun akordu New Deal ba pais sira g7+ (Pilot Countries) hanesan Timor-Leste, Libéria, Repúblika Demokratika Kongo, Guiné-Bissau, Sudaun Sul, Afeganistaun, ho sira nia parseiru Internasionál sira.

Rezultadu husi sorumutu ida ne’e sei hanesan matadalan ka planu servisu hodi monitoriza no implementa New Deal iha tinan 2012.

Sorumutu ida ne’e fasilita husi Sekretariadu g7+ iha Timor-Leste no hein atu hetan partisipasaun másima husi reprezentante g7+ nian husi nasaun nain sanulu mak hanesan Libéria, Serra Leoa, Afeganistaun, Ilhas Salomaun, Repúblika Áfrika Sentrál, Repúblika Demokratika Kongo, Sudaun Sul, Guiné-Bissau, Chade e Somália. Marka prezensa mós representante husi Banco Mundial, ODI no OECD.