Komemorasaun Loron Proklamasaun Independénsia Timor-Leste ba dala 36 (28 fulan Novembru 1975)
Timor-Leste sei komemora loron proklamasaun independénsia ba dala 36 iha loron 28 fulan Novembru tinan 2011.
Komemorasaun ne’e sei hala’o iha Palásiu Prezidente.
Tuir programa ne’ebé Komisaun Organizadora Ministériu Administrasaun Estatál no Ordenamentu Territóriu prepara, serimónia sei hahú dahuluk ho misa agradesimentu iha igreja Katedrál, Dili, iha loron 27 fulan Novembru, tuku 07.30 Otl.
Serimónia ofisiál ka isár bandeira sei hala’o iha loron 28 fulan Novembru, tuku 08.00 Otl ne’ebé sei diriji hosi Prezidente Repúblika, José Ramos-Horta, ne’ebé akompaña hosi Prezidente Parlamentu Nasionál, Fernando La Sama de Araújo, Primeiru-Ministru, Kay Rala Xanana Gusmão, no Prezidente Tribunál Rekursu, Claúdio Ximenes, no konvidadu sira seluk.
Komemorasaun ne’e sei taka ho serimónia hatun bandeira nasionál iha parte lorokraik.
