Governu Timor-Leste

Ministériu Saúde liu hosi, Ministru Saúde, Nelson Martins, iha tersa-feira, loron 8 fulan Novembru 2012, ofisialmente hala’o lansamentu ba livru ho nia titlu, “Revitalizasaun Kuidadu Saúde Primária Iha Timor Leste”. ne’ebé hetan suporte husi Fundu Populasaun ba Nasoens Unidas (UNFPA – United Nations Population Fund) iha Timor Leste.

Programa servisu integeradu Saúde komunitária SISCa nudar meiu ne’ebé Ministériu Saúde implementa hodi responde ba promesa IV Governu Konstitusionál nian hodi fasilita povu ba asesu saúde iha suku no aldeia sira.

“Livru foun ne’ebé agora daudaun lansa hanesan meiu ida atu responde ba pergunta sira ne’ebé mai hosi públiku ba knaar nain saúde sira, Parseiru Dezenvolmentu, Estudante, Lider Komunidade sira no mós sira ne’ebé mai hosi nasaun seluk ne’ebé hakarak hatene kona-ba SISCa iha Timor-Leste”.

Nelson Martins hatutan katak, susesu ne’ebé durante ne’e Ministériu Saúde hetan mak konsege hamosu programa, Pasta Mutin, Rejista Saúde Familiar, Asistensia Saúde ba Idozu sira, Hadi’a jestaun hotu iha distritál no mós hola kareta multifunsionál ba maternidade iha suku no subdistritu sira hotu iha teritóriu laran tomak.

Ministériu Saúde agora daudaun dezeña hela sanitáriu ho modelu foun ne’ebé mak atu halo iha suku sira hotu iha territóriu laran tomak servisu hamutuk ho Universidade Nasionál Timor Lorosa’e, hodi estabelese eskola superiór parteira, infermajen no medisina iha Fakuldade Siénsia Saúde.