Autoridade Bankária Pagamentu (ABP) sai nu’udar Banku Sentrál Timor-Leste (BSTL)
Autoridade Bankária Pagamentu Timor Leste (BPA) ofisialmente Transforma ba Banku Sentrál Timor Leste (BSTL), iha Loron 13 Fulan Setembru, iha Edifisiu Autoridade Bankária Pagamentu (BPA).
Primeiru-Ministru Interinu José Luis Guterres, iha ninia intervensaun hateten katak, “ho transformasaun Autoridade Bankária Pagamentu ba banku Sentrál Timor-Leste nian ne’e sei fó benefísiu pozitivu ba Timor-Leste nu’udar Nasaun foun hodi bele garante termu politíka monetáriu nian, sistema ekonómiku ne’ebé sustentável, ekilibriu no transparénsia tanba reprezenta makro ekonómiku ida ne’ebé bo’ot tebe-tebes ba ita nia rain, hodi bele garante indenpendénsia ne’ebe sustentavél ba fundu petroliu nian.
Iha fatin hanesan Prezidente Repúblika, José Ramos-Horta, iha nia intervensaun hateten katak, ho “transformasaun Autoridade Bankária Pagamentu ba Banku Sentrál Timor-Leste, bele jere no tau matan di’ak liután ba orsamentu jerál estadu nian ne’ebé tinan-tinan Governu gasta ho indenpendénsia, tanba Nasaun Soberanu hotu-hotu iha mundu ne’e iha sira nia banku Sentrál, Banku sentrál ne’e mak iha duni autoridade, kredibilidade no independénsia. “Ramos Horta hatutan tan katak ho pasajen ida ohin hanesan inísiu ida ba dezafiu foun no mós prova ida ba konsolidasaun no kapasidade instituisaun nasionál nian. Prezidente Horta husu ba BSTL atu kontinua hala’o knaar ho responsabilidade, independénsia no tranparénsia.
Governadór Banku Sentrál Timor Leste, Abrãao de Vasconcelos, afirma katak, BSTL ofisialmente hamrik ona iha Timor-Leste hodi kontrola kualkér atividade banku privadu hotu iha rai ida ne’e, hodi hala’o kontabilidade, transparénsia no mós difini ona kompeténsia ba Funsaun Banku Sentrál nian hodi permiti prosesu supervizaun nian hosi Públiku.
Abrão subliña BSTL, nia simbólu mak Karau Metan Timor nian ne’ebé aprezenta riku soin Timor nian ho konseitu estabilidade banku sentrál no karakteriza transparansia ba sistema finanseiru Timor nian.
Iha serimónia ne’e partisipa hosi Prezidente da Repúblika, José Ramos-Horta, Primeiru-Ministru Interinu José Luis Guterres, Prezidente Parlamentu Nasionál Fernando Lasama de Araujo, Prezidente Tribunál Rekursu Claúdio Ximenes, Vise Reprezentante Sekretariu Jerál Nasõens Unidas iha Timor-Leste Finn Reske-Nielsen, Eis Primeiru Ministru Mari Alkatiri, Eis Prezidente Parlamentu Nasionál Francisco Guterres Lu-Olo, Proklamador Francisco Xavier do Amaral no membru Governu, Membru Parlamentu Nasionál no korpu diplomatiku sira.
