Governu Timor-Leste

Prezidente Repúblika José Ramos-Horta, akompaña husi Primeiru-Ministru Kay Xanana Gusmão, Ministru Infra-Estruturas Pedro Lay, Prezidente Parlamentu Nasionál, Fernando Lasama, no Embaixadór Japaun ba Timor-Leste, Iwao Kitahara iha sexta-feira, loron 29 fulan Jullu inaugura Ponte Mola iha subdistritu Zumalai, Covalima.

Ponte ne’e hahú ninia konstrusaun iha fulan Janeiru 2010 hosi kompañia Japaun, Dai Nippon Construction (DNC) ho totál orsamentu millaun sia no remata ninia konstrusaun iha fulan Jullu 2011 ho nia naruk metru 216.

“Ponte Mola estratéjiku tebtebes no sei sai ponte dezenvolvimentu no indústria ba povu no nasaun Timor-Leste ho nasaun viziñu Indonézia. Tanba ne’e, sei ita nia ekonomia dinámiku, la’o di’ak sei benefisia ita nian maluk sira ne’ebé hela iha Atambua, Indonesia,  tanba ita sei fa’an sasán ba sira no sira mós sei fa’an sasán mai ita. Ita nian relasaun entre Indonézia no Timor Leste sei di’ak tebe-tebes no dezenvolvementu iha fronteira sei sai di’ak liután. Tan ne’e ho Inaugurasaun Ponte Mola  ida  ne’e, hanesan pasu ida ne’ebé importante, tanba ita bele normaliza ativdade ekonómika iha distritu ida ne’e” hateten Prezidente José Ramos-Horta iha nia diskursu.

Iha fatin hanesan Ministru Infraestrutura Pedro Lay hateten “Hau lori Governu Timor-Leste, liliu Ministériu Infraestrutura nia naran fó agradese barak ba Governu japaun nian hodi harii ponte ida ne’e hanesan pasu signifikante ida hodi tulun tan Infraestrutura Timor-Leste nian,”

Embaixadór Japaun ba Timor-Leste, Iwao Kitahara bainhira hato’o ninia diskursu ba inaugurasaun Ponte Mola, nia hateten, “Kompletamentu konstrusaun Ponte Mola sai hanesan símbolu ida tan ba relasaun amizade entre povu Timor-Leste no povu Japaun. Governu no povu Japaun fornese fundu hamutuk dolár millaun sia (9 miliaun dolar)  hodi halo konstrusaun ba Ponte Mola.”

Embaixadór ne’e mós hatutan tan “Hau agradese no fó obrigadu barak ba esforsu no pasiénsia tomak ne’ebé hatudu durante konstrusaun, no ohin ita bele halibur malu iha ne’e hodi inaugura Ponte Mola, ho inaugurasaun Ponte ne’e bele hadi’a kondisaun moris povu no bele hasa’e volume tráfiku entre sidade indústria atu salva transporte sira hotu ne’ebé sirkula iha área fronteira nian, nune’e bele hadi’a asesu ba merkadu lokál sira, atendimentu ba saúde no edukasaun.”