Governu Timor-Leste

Iha loron 14 fulan Juñu, tinan 2011, delegasaun g7+ nian inklui ministru na’in sia, partisipa iha sorumutu iha Monróvia, Libéria hodi diskute kona-ba kestaun barak ne’ebé ninia objetivu mak atu hetan konsensu kona-ba harií Estadu no Nasaun. Eventu ne’e prezide hosi Ministra Finansa Timor-Leste nian, Emilia Pires no Ministru Planeamentu no Asuntu Ekonómiku Libéria nian, Amara Konneh.

Tuir mós iha eventu ne’e mak Ministru Oliver Kamitatu, hosi Repúblika Demokrátika Kongu nian, ne’ebé mak hato’o aprezentasaun ida kona-ba objetivu hirak hosi diálogu ne’ebé mak sei hala’o ho parseiru dezenvolvimentu nian sira. Ministra Finansa, Emília Pires, ko’alia kona-ba prosesu naruk ne’ebé mak Timor-Leste hakat liu to’o hatuur eventu ne’e iha Monróvia no Foru Altu nível ne’ebé mak sei hala’o iha Busan, Iha Koreia Sul, iha Novembru oin mai.

Tópiku seluk ne’ebé sorumutu g7+ nian hato’o mak atu identifika interese hirak komún hosi Estadu hirak frájil ka iha situasaun konflitu nian (g7+), ne’ebé mak diskute tiha ona hamutuk ho parseiru dezenvolvimentu nian iha diálogu internasionál, ne’ebé mak hala’o tiha ona iha loron 15 no 16 fulan Juñu, tinan 2011, hodi hamosu Roteiru (manuál) Monróvia nian kona-ba atu Harii Dame no Estadu. Interese hirak komún hanesan: lejitimasaun polítika, seguransa, servisu ba ema hotu, asesu ba justisa no jestaun di’ak ba rekursu sira.

Delegadu sira konkorda atu halo retiru ida iha Sudaun Sul, iha loron 18 no 19, fulan Outubru  atu diskute kona-ba asuntu oin-oin, hanesan estrutura g7+ nian, planu traballu, sekretariadu no autofinansiamentu.