Sorumutu estraordinária Konsellu Ministru, loron 24, fulan Janeiro 2011

V GOVERNO CONSTITUCIONAL

SECRETARIA DE ESTADO DO CONSELHO DE MINISTROS

.............................................................................................................................................

KOMUNIKADU BA IMPRENSA

Sorumutu estraordinária Konsellu Ministru, loron 24, fulan Janeiro 2011

Konsellu Ministru hala’o sorumutu estraordinária iha Segunda-feira ida ne’e, loron 24, fulan Janeiru 2011, iha Sala Sorumutu Konsellu Ministru nian, iha Palásiu Governu, iha Díli hodi aprova:

1. Rezolusaun ne’ebé aprova Ajuda Finanseira ba Brazil tanba xeia ka inundasaun no rai monu

Tanba inundasaun ho rai monu ne’ebé afeta Brazil, liuliu iha rejiaun serrana iha Rio de Janeiro, ne’ebé estraga buat barak- konsidra nu’udar dezastre naturál boot liu ne’ebé mosu iha Brazil – mak Konsellu Ministru, ho aktu solidariedade, fraternidade no apoiu ba povu no autoridade país ne’ebá nian, aprova ona atu fó ajuda finanseira ho valór dólar amerikanu rihun atus lima, hodi ajuda atu ultrapasa materiál no ema sira ne’ebé lakon.

2. Rezolusaun ne’ebé aprova Ajuda Finanseira ba Sri Lanka tanba inundasaun

Konsellu Ministru, ho aktu solidariedade, fraternidade no apoiu ba povu no autoridade  Sri Lanka nian, aprova ona mós atu fó ajuda finanseira ho valór dólar amerikanu rihun atus lima, hodi ajuda ultrapasa materiál no ema sira ne’ebé lakon ne’ebé rejista iha país ne’ebá tanba inundasaun maka’as ne’ebé provoka ema liu tokon ida mak sai hosi sira nia hela fatin.

3. Nomeasaun Reprezentante Governu nian iha Konsellu Opiniaun Rádiu no Televizaun Timor-Leste, E.P.

Guilherme da Silva no Paula Rodrigues mak hetan nomeasaun nu’udar reprezentante Governu nian iha Konsellu Opiniaun ba Rádiu no Televizaun Timor-Leste, E.P. (RTTL, E.P.) ba mandatu ida tinan haat.

Konsellu Opiniaun, tuir Estatutu RTTL, E.P. nian, iha kompeténsia prinsipál hodi konsulta no fó sai paresér kona-ba planu anuál no plurianuál atividade no finansa nian, nune’e mós kona-ba orsamentu esplorasaun no investimentu no dokumentu prestasaun kontas nian.

4. Proposta  kona-ba delegasaun Timor-Leste nian hodi hala’o sorumutu bilaterál ho Santa Sé

Konsellu Ministru aprova ona, hodi forma delegasaun Timor-Leste nian ne’ebé sei hola parte iha sorumutu bilaterál sira ho Santa Sé hodi diskuti Projetu Konkordata ne’ebé sei hala’o entre parte rua ne’e. Delegasaun ne’e, kompostu hosi membru Governu nain haat hanesan tuir mai ne’e:

  1. Zacarias Albano da Costa, Ministro dos Negócios Estrangeiros
  2. Lúcia Lobato, Ministra da Justiça
  3. João Câncio Freitas, Ministro da Educação
  4. Domingas Fernandes, Ministra da Solidariedade Social
   Ba leten