Governu sei rekruta tan membru F-FDTL hamutuk 600
Iha tinan 2011, Governu Timor-Leste sei rekruta tan elementu foun ba Falintil - Forsa Defeza Timor-Leste (F-FDTL) hamutuk ema 600 hodi kompleta númeru ne'ebé instituisaun ida ne’e presiza.
Prezidente júri ba rekrutamentu, João Côrte-Real de Araújo, hateten katak “bazeia ba lei servisu militár nian, sei loke rekrutamentu ba joven foin-sa’e voluntáriu, feto ka mane, ne’ebé mak hakarak servi iha vida militár, tuir rezime voluntáriu atu bele prenxe vaga hamutuk 600, kompostu hosi fatin 92 ba ofisiál, 157 ba sarjentu no 351 ba prasa. João Corte-Real informa lia hirak ne’e iha ninia servisu fatin foin lalais ne’e.
Kritériu ne’ebé mak presiza iha rekrutamentu ne’e mak, joven mane ka feto tenki ho idade 17 to’o 24, ba vaga ofisiál idade máxima mak tinan 28. Aleinde ne’e tenke iha diploma lisensiatura ka baxarelatu ba ofisiál sira, sarjentu tenki iha diploma sekundária no prasa tenke iha diploma pré-sekundária ka kompleta eskola primária. Kritériu seluk mak tenki a’as ho 150 cm no 45 Kg ba feto no ba mane tenke a’as ho 160 cm no todan tenki 60 Kg.
Rekrutamentu ne’e sei hahú iha loron 3 to’o loron 31 fulan Janeiru 2010. Formuláriu ba rekrutamentu ne’e bele hetan iha Administrasaun Distritu no Sub-distritu ida-idak.
