Festivál Kultura Timor-Leste
Festivál Kultura Timor-Leste hahú iha kinta, loron 25 Novembru, no sei hala’o durante loron haat, iha jardín Palásiu Presidensál, Nicolau Lobato, iha Díli.
Eventu ne’ebé organiza hosi Sekretaria Estadu Kultura, sai hanesan parte ida hosi komemorasaun ba da-35 aniversáriu deklarasaun Independénsia Repúblika Demokrátika Timor-Leste, iha 28 Novembru 1975.
Iha abertura Serimónia Festivál ne’e alta personalidade nasionál no internasionál barak mak marka sira nia prezensa, no iha Festivál ida-ne’e mós diskursu barak mak fó sai hosi Prezidente Repúblika, José Ramos-Horta, no hosi Sekretáriu Estadu Kultura, Virgílio Simith, ne’ebé koalia kona-ba importánsia hosi tipu eventu hirak ne’e hodi bele rekupera diversidade no rikeza espresaun hirak ne’ebé mak uluk Timor-Leste iha.
Hosi loron 25 to’o 28 Novembru, Palásiu Prezidensiál sei sai hanesan palku ba programa ida bo’ot tebes kona-ba kultura, ne’ebé mak inklui dansa, múzika tradisionál no inspirasaun europeia, arte, ofísiu no hahán. Maske atividade ne’e oin-oin, maibé hanesan atu destaka liu iha Festivál Kultura Timor-Leste nian ne’e mak dansa tradisionál: tebe dahur.
“Tebe dahur mak dansa grupu, ritu no konfraternizasaun, ne’ebé mak hanesan iha país tomak, hosi rai-tetuk litorál nian to’o foho tutun iha Timor-Leste. Dala balun iha oras barak nia laran, mane ho feto sira dansa no hananu, hodi simu bainaka ka hodi fó hatene kona-ba momentu importante ida iha komunidade nia moris”, esplika Sekretáriu Estadu Kultura, Virgílio Simith.
