Sidade Port Philip, Melbourne, Australia konvida reprezentante sira hosi distritu Kovalima
Sidade Port Philip, Melbourne, Australia liu hosi Ministériu Administrasaun Estatál no Ordenamentu Territóriu (MAEOT) konvida reprezentante sira hosi programa Sidade Amiga iha distritu Kovalima atu ba vizita sira nia fatin ho ojetivu atu renova Nota Entendimentu, lansa planu estratéjiku ba kooperasaun, hametin relasaun amizade, troka hanoin kona-ba programa Sidade Amiga. Vizita ne’e sei hala’o hahú hosi loron 15 to’o loron 29 fulan Outubru 2010.
Adjuntu Administradór distritu Kovalima, Teófilo do Carmo hateten “Hau sente haksolok tebes simu konvite hosi belun sira hosi Sidade Port Philip, ne’e oportunidade di’ak ba ami atu koñese malu di’ak liu tan, aumenta hau nia koñesimentu, ideia no vizaun ne’ebé importante ba distritu Kovalima liu-liu iha programa Sidade Amiga.
Teófilo do Carmo ne’ebe akompaña hosi Koordenadór Sentru Komunidade Kovalima nian, Sr. Alberto de Jesus Barros sei hola parte iha komemorasaun tinan 10 programa ne’e hari’i, asina versaun atualizada Karta Entendimentu no lansa Planu Estratéjiku Kooperasaun ba 2010-2020, oportunidade ba haree oinsa Munisípiu iha Australia funsiona, hasoru malu ho organizasaun parseiru sira ne’ebé fó tulun hodi hametin relasaun amizade.
Tulun ne’ebe Sidade Port Philip fó ba distritu Kovalima mak, reabilitasaun ba rezidénsia Administradór distritu, reabilitasaun ba Sentru Komunidade Kovalima no instalasaun ba komputadór sira, programa agrikultura, kapasitasaun ba joven sira iha kursu lian Inglés no komputadór.
