Deklarasaun kona-ba Dra. Helen Hill nia mate
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 8 Fulan-Maiu Tinan 2024
Komunikadu Imprensa
Deklarasaun kona-ba Dra. Helen Hill nia mate
Dra. Helen Hill hala’o nia moris nakonu ho solidariedade ba Timor-Leste
Nia hahú vizita Dili ba dahuluk iha inísiu tinan 1975, tempu ne’ebé nia hanoin-hetan hanesan “espetativa no otimizmu” ida.
Ninia planu hodi hakerek teze mestradu ida kona-ba tranzisaun ba independénsia Timor Portugés termina ho invazaun Indonézia nian.
Envezde ne’e, nia hakerek “The Timor Story” ne’ebé publika iha finál tinan 1975, ne’ebé sai fali hanesan bíblia ida ba akadémiku no ativista sira ne’ebé hakarak hatene barak kona-ba iha ita-nia rain ne’ebé iha momentu susar no to’o akontese invazaun.
Dra. Helen ikusmai sai akadémika internasionál importante ida iha área dezenvolvimentu komunitáriu iha Timor-Leste.
Nia nu’udar mentora ba estudante timoroan rihun-ba-rihun iha Dili no iha Universidade Victoria iha Melbourne, iha ne’ebé nia hanorin durante tinan barak.
Nia nu’udar ko-organizadora ba konferénsia bienál iha Universidade Victoria no Universidade Nacional Timor-Lorosa’e (UNTL).
Nia mós nu’udar Profesora Konvidada iha UNTL no Membru Onoráriu Universidade Victoria nian.
Nia simu medalla agradesimentu ho Orden Timor-Leste, ba ninia vida solidariedade ba ita-nia país iha tinan 2014.
Helen mós nu’udar ko-fundadora ba Asosiasaun Austrália -Timor-Leste
Helen Hill ajuda fahe ita-nia istória no ita-nia luta ba mundu. Nia hanorin estudante rihun ba rihun. Ami sei sente saudades tebes ho ninia auzénsia.
Vale Helen.
