Apoiu Pontuál ba ema iha situasaun vulnerabilidade aas tebtebes
Konsellu Ministrus, iha sorumutuk husi loron 3 fulan-abril tinan 2024, aprova ona projetu Dekretu-Lei, ne’ebé aprezenta husi Ministra Solidariedade Sosiál no Inkluzaun, Verónica das Dores, kona-ba kriasaun Apoiu Pontuál ba ema iha situasaun vulnerabilidade aas tebtebes. 
Ho aprovasaun diploma ida-ne’e, hakarak atu estabelese apoius ba ema mukit no kiak liu, ne’ebé Estadu fó ba indivíduu no agregadu familiár sira iha situasaun vulnerabilidade aas tebetebes. Apoiu sira-ne’e ho objetivu atu asegura pontualmente satisfasaun nesesidades bázikas benefisiáriu sira nian, hodi hamenus sira-nia terus no fó kondisaun ne’ebé di’ak liu ba dignidade umana durante prosesu reintegrasaun sosiál.
Tipu apoiu ba ema mukit no kiak liu ne’ebé sei fó no ninia montante depende ba avaliasaun situasaun vulnerabilidade sosiál ne’ebé sei halo husi profisionál departamentu governamentál ne’ebé responsavel ba asisténsia sosiál, ne’ebé sei halo avaliasaun ba ezisténsia hosi situasaun vulnerabilidade tebetebes.
