Governu Timor-Leste

Ministru Petróleu no Rekursus Minerais, akompaña husi Primeiru-Ministru, Kay Rala Xanana Gusmão, anunsia fó lisensa prospesaun no peskiza minerais metálikus ba empreza Estrella Resources no Peak Everest Mining, Lda, atu halo peskiza iha Munisípiu Lautein. Serimónia ne’e hala’o iha Lautein, iha loron 26 fulan-marsu tinan 2024. 

Iha eventu ne’ebé realiza iha Lautem, Prezidente Autoridade Munisípiu Lautem, Mélio de Jesus fiar katak, empreza ne’ebé autorizadu sei halo atividade ho susessu, tanba sei envolve komunidade no uzu konteúdu lokál iha indústria ne’e, nune’e hodi promove dezenvolvimentu sustentavel iha rejiaun ne’e.

Prezidente Autoridade Nasionál Minerais (ANM), IP, Rafael Danilson Magno, konsidera eventu ida-ne’e hanesan momentu istóriku ida, no esplika katak empreza sira ne’ebé hetan autorizasaun sei hala’o atividade peskiza no prospesaun durante tinan haat, hodi halo análize jeolójika, jeofízika no laboratóriu hodi hatene di’ak liu rekursu minerál sira iha rejiaun ne’e.

Ministru Petróleu no Rekursus Minerais, Francisco da Costa Monteiro agradese ba ANM, I.P. ne’ebé implementa atividade ne’ebé antes ne’e inisia iha governu anterior no tenik katak, empreza barak mak interessadu atu mai investe iha Timor-Leste. 

Ministru Petróleu no Rekursus Minerais, Francisco da Costa Monteiro, agradese ba ANM, I.P. no manifesta ninia satisfasaun kona-ba interese setór privadu ne’ebé makaas atu investe iha Timor-Leste. Governante ne’e insentiva entidades hotu iha munisípiu ida-ne’e atu kontribui ba susesu atividade prospesaun no peskiza minerais metálikus, liuhosi monitoriza no promove atividades kulturál hodi fasilita esforsu peskiza nian.

Ba Primeiru-Ministru, Kay Rala Xanana Gusmão, lansamentu ida-ne’e hanesan inísiu era foun ida ba investimentu minerais metálikus, ne’ebé bele lori benefísiu signifikativu ba ekonomia nasionál.

Xefe Governu mós subliña katak, ho peskiza no prospesaun ida-ne’e bele identifika rekursu minerál sira ne’ebé iha valór, ne’ebé sei promove dezenvolvimentu iha país ne’e.

Xanana Gusmão foka-liu potensiál kalkáriu ba produsaun simentu, ne’ebé sei hamenus dependénsia ba importasaun. Xefe Governu ne’e hato’o mós ninia konfiansa katak, bainhira termina faze peskiza, Governu sei fó-sai lisensa ba esplorasaun, ne’ebé sei kontribui ba kreximentu ekonómiku no dezenvolvimentu sustentavel iha Timor-Leste.

Prosesu identifikasaun ba rekursus minerais ida-ne’e hahú ona iha tinan 2018, tuir lejizlasaun kódigu mineiru, ne’ebé ikusmai loke konkursu ba peskiza minerais metálikus iha tinan 2023, iha ne’ebé empreza Estrella Resources no Peak Everest Mining, Lda maka selesionadu hafoin prosesu kritériu selesaun ida ne’ebé rigorozu.

Estrella Resources maka sei responsavel ba peskiza manganés, kobre, osan-mutin no osan-mean iha área konsesaun tolu ne’ebé lokaliza iha aldeia Serelau, Baduru, Maina I, Maina II no Daudere. Empreza timoroan Peak Everest Mining maka sei halo peskiza ba manganés iha aldeia Eukissi, Daudere, Afabubu no Wairoke.