Timor-Leste no Laos harii kooperasaun iha área Ekonomia, Komérsiu no Teknolojia
Estadu Timor-Leste, reprezenta husi Ministru Negósius Estranjeirus no Kooperasaun, Bendito dos Santos Freitas, formaliza ona akordu kooperasaun inisiál ida iha área ekonomia, komérsiu no teknolojia ho Vise Primeiru-Ministru no Ministru Negósius Estranjeirus Repúblika Demokrátika Populár Laos, Saleumxay Kommasith. Serimónia asinatura ne’e, hala'o iha Salaun Asembleia Nasionál Laos, iha Vientiane, iha loron 29 fulan-fevereiru tinan 2024. 
Akordu ida-ne’e asina durante vizita ofisiál Prezidente Repúblika, José Ramos Horta, ba Laos no hafoin enkontru bilaterál ida entre Prezidente Repúblika Timor-Leste ho ninia omólogu Repúblika Demokrátika Populár Laos, Thoungloung Sisouliht
Iha Enkontru bilateral ida-ne’e, Xefe Estadu sira diskute atu hametin relasoins kooperasaun entre nasaun rua no diskute mós prosesu adezaun Timor-Leste nian ba ASEAN, inklui mós asuntu rejionál no multilaterál.
Tanba ne’e, Prezidente husi nasaun rua ne'e reafirma importánsia kriasaun komisaun konjunta ida entre Timor-Leste ho Laos atu halo peskiza no análize ba oportunidade kooperasaun iha área indústria, transporte, kriasaun kampu traballu, turizmu, agrikultura, mina-rai no iha área kooperasaun seluk ne'ebé posivel. 
