Loron Nasionál Veteranus tinan 2024
Loron Nasionál Veteranus tinan 2024
“Hamutuk Ita sei hakat ba Futuru”
Hosi loron 1 to’o 3 fulan-marsu tinan 2024, sei hala’o Komemorasoins ba Loron Nasionál Veteranus, hodi fó onra ba kontributu ne’ebé fó ona hosi martir, kombatente no veteranu sira ne’ebé luta ba independénsia Repúblika Demokrátika Timor-Leste (RDTL) nian.
Selebrasaun sira ne’e sei hahú iha loron 1 fulan-marsu, ho misa iha tuku 9:00 iha Igreja Parokiál Balide Dili. Tuirmai sei halo peregrinasaun ida hosi Dili ba Jardim dos Heróis e Mártires da Pátria, Metinaro, hodi tau ai-funan. Iha tuku 13:00, sei iha almosu konfraternizasaun ida iha sede Konsellu Kombatentes Libertasaun Nasionál (CCLN, Sigla iha lian portugés). Iha tuku 14:00, sei hahú vizitas giadas hodi haree espozisaun armas Funu-na’in sira nian durante gerilla tinan 24, iha Salaun Aisserimou, Sede CCLN nian; Portu Istóriku Dili, Arkivu & Muzeu Rezisténsia Timorense (AMRT); Semitériu Santa Cruz; no iha arkivus Sentru Nasionál Chega! (CNC, Sigla iha lian Portugés).
Iha loron 2 fulan-marsu, hosi tuku 9:00 to’o tuku 16:30, sei hala’o semináriu ida iha Centro de Convenções de Díli (CCD) ho palestra hosi Tenente Jenerál Reformadu, Lere Anan Timur, Ministru ba Asuntus Kombatentes Libertasaun Nasionál, Gil da Costa Monteiro “Oan Soru” no Ministru Defeza, Komodoru Pedro Klamar Fuik.
Iha loron 3 fulan-marsu, Loron Nasionál Veteranus, sei hala’o selebrasoins iha Palásiu Governu, iha tuku 8:15 ho dada-sa’e bandeira RDTL, diskursu ofisiál sira no ho marxa veteranus to’o CCD, iha ne’ebé sei iha almosu konfraternizasaun no sei hala’o atividades to’o tuku 15:30, iha momentu hatún bandeira nasionál.
