Governu hato’o kondolénsia ba Harold Mitchell AC nia mate
Presidência do Conselho de Ministros
Porta-Voz do Governo de Timor-Leste
IX Governo Constitucional
.............................................................................................................................
Díli, 12 de fevereiro de 2024
Comunicado de Imprensa
Governu hato’o kondolénsia ba Harold Mitchell AC nia mate
Ho laran triste tebes Governu Repúblika Demokrátika Timor-Leste simu notísia kona-ba emprezáriu no filantropu australianu, Harold Mitchell AC nia mate, iha loron 10 fulan-fevereiru liubá, ho idade 81.
Harold Charles Mitchell AC moris iha Trafalgar, iha Estadu australianu Victória, iha loron 13 fulan-maiu tinan 1942.
Nia hanesan Prezidente Ezekutivu Mitchell Communication Group no Aegis Media Pacific, envolve mós iha Television Sydney. Iha tinan 2000, nia harii Harold Mitchell Foundation, ho objetivu atu fó rekursus ba kauza oin-oin, foka liu ba promosaun saúde komunitária, edukasaun no arte. 
Mitchell dezempeña ona papél importante iha organizasaun oin-oin, inklui Florey Institute of Neuroscience and Mental Health, New York Philharmonic, National Gallery of Australia, Museum Board of Victoria, Opera Australia, a CARE Australia, Melbourne Symphony Orchestra, Tennis Australia, Deakin Foundation, Melbourne International Festival of Arts no Australia-Indonesia Centre.
Iha tinan 2004, nia simu rekoñesimentu públiku husi ninia kompromisu komunitáriu, hafoin hetan nomeasaun hanesan Ofisiál (AO) Orden Austrália, no iha tinan 2010, simu distinsaun sivíl australiana ne’ebé aas liu, sai hanesan Kompañeiru (AC) Orden Austrália nian.
Ninia kontribuisaun boot tebes ba dezenvolvimentu Timor-Leste bainhira nia hetan rekoñesimentu ne’ebé atribui ba nia distinsaun sivíl Timor-Leste nian ne’ebé aas liu, Kolár Orden Timor-Leste, iha fulan-maiu tinan 2023. Harold Mitchell AC fó ona apoiu finanseiru ba Muzeu Memoriál Dare, Projetu Língua Materna hosi Alola, Orfanatu Santa Bakita no Balibo House Trust.
Primeiru-Ministru, Kay Rala Xanana Gusmão, hato’o ninia sentimentu ne’ebé triste tebes, hodi hateten katak “Harold Mitchell AC hanesan Timor-Leste nia belun di’ak no ema ida koñesidu” no “lori povu Timor-Leste nia naran”, hato’o ninia “sinsera kondolénsia ba ninia família no belun sira”, hanoin hikas katak amizade entre sira rua ne’e “hahú husi tinan 2001, bainhira Harold, hanesan Prezidente Festival Melbourne nian, konvida ha’u ba Melbourne hanesan parte husi Interkámbiu Kulturál ida entre Austrália no Timor-Leste”.
Xanana Gusmão ko’alia-liu mós ba “asisténsia ne’ebé boot tebes iha área importante oin-oin” ne’ebé oferese gratuita ba ninia Governu iha tinan 2007.
Xefe Governu termina ninia karta no hateten katak “Austrália no Timor-Leste lakon ona ema brillante no laran luak ida, maibé ninia eransa sei nafatin fó influénsia pozitiva ba ema barak nia moris”.
Porta-Voz Governu nian, Ministru Agio Pereira, afirma katak “Timor-Leste sei la haluha Harold Mitchell AC no sei lembra nafatin ho domin boot, admirasaun no respeitu. Iha tempu triste ida-ne’e, ami lamenta ninia mate, maibé ami selebra ninia kontributu”. REMATA
