Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Loron 27 fulan-dezembru tinan 2023

Komunikadu Imprensa

Bandu ema uza fogete artifisiál no artefaktu pirotékniku sira seluk iha territóriu nasionál tomak

Tuir Despaxu Konjuntu n. 127/MCI-MI/XII/2023, loron 18 fulan-dezembru, Governu, iha koordenasaun ho Polísia Nasionál Timor-Leste (PNTL), fó-sai katak bandu ema uza fogete artifisiál no artefaktu pirotékniku sira seluk iha territóriu nasionál tomak.

Tanba verifika ona katak iha dezobediénsia ba desizaun ida-ne’e husi parte populasaun nian, hatudu katak mosu insidente barak foin lalais ne’e iha área sira hanesan Dili, Vikeke, Ermera, Bobonaru, no seluk tan, ne’ebé rezulta perturbasaun ba selebrasaun relijioza iha fatin sagradu, igreja no aredór sira, no ho objetivu prinsipál atu salvaguarda pás no seguransa ba populasaun, PNTL sei buka tuir iha sidade Dili laran no iha territóriu nasionál tomak, ho kolaborasaun metin ho Ministériu Interiór. Durante operasaun sira-ne’e, sei prende hotu fogete artifisiál no artefaktu pirotékniku sira seluk ne’ebé ema uza hodi viola proibisaun ne’e.

Sei intensifika mós asaun patrullamentu iha fronteiras, ho atensaun liu ba entrada ilegál sira, ho objetivu atu prende fogete artifisiál no artefaktu pirotékniku sira ne’ebé bele hatama mai territóriu nasionál.

Dispozitivu sira ne’ebé prende sei entrega ba Prezidente Autoridade Dili, no sei superviziona distribuisaun materiál sira-ne’e ba Postu Administrativu Munisípiu Dili nian sira, hodi promove jestaun ida ne’ebé responsavel no seguru ba materiál sira-ne’e.

Governu husu kompriensaun no kolaborasaun populasaun nian ba esforsu hamutuk ida-ne’e atu garante seguransa no moris-di’ak sidadaun sira hotu nian. La kumpre proibisaun ida-ne’e sei hetan pena tuir lejizlasaun ne’ebé vigora. REMATA