Pagamentu Extraordináriu ba Saláriu Adisionál ba Traballadór sira iha Administrasaun Públika Promulga Ona
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Díli, Loron 19 fulan-dezembru tinan 2023
Pagamentu Extraordináriu ba Saláriu Adisionál ba Traballadór sira iha Administrasaun Públika Promulga Ona
Governu Konstitusionál IX, tuir prátika ne'ebé estabelese ona husikedas tinan 2014, aprova ona pagamentu estraordináriu kona-ba saláriu adisionál fulan ida nian ba traballadór sira iha Administrasaun Públika no ninia ekiparadu sira, ne’ebé agora promulga ona liuhusi Dekretu Lei n. 86/2023, husi loron 18 fulan-dezembru. Subsídiu ida-ne'e, ne'ebé hanesan Subsídiu Natál ka fulan da-13, ninia objetivu mak atu rekoñese no valoriza empeñu no esforsu husi funsionárius, ajentes ka kontratadu, atu hetan sira-nia direitu no benefísiu hanesan ho traballadór nasionál sira seluk.
Tuir Lei Traballu no Estatutu Remuneratóriu ba titulár sira ne'ebé hetan kargu polítiku, pagamentu estraordináriu ida ne'e ninia objetivu mak atu ekipara benefísiu sira ne'ebé oferese ba traballadór Administrasaun Públika ho sidadaun sira seluk, ne’ebé garante remunerasaun ida-ne'ebé justa no tuir prátika internasionál ne’ebé di’ak tebes.
Diploma ne'ebé hetan ona aprovasaun ein jerál inklui titulár kargu públiku hotu-hotu no traballadór sira Administrasaun Públika nian, ne’ebé la inklui kontratadu estranjeiru no eis-titulár no eis-membru sira husi órgaun soberania ne'ebé sira nia pensaun kalkula tuir saláriu husi titulár kargu públiku sira.
Valór ba pagamentu estraordináriu ne'e mak ekivale ho saláriu ka pensaun mensál benefisiáriu nian iha fulan-dezembru tinan 2023. Atu asegura uniformidade ba pagamentu, montante ne'ebé destina ba kontratadu sira ekipara ho rejime jerál, ne’ebé limita ba valór grau no eskalaun másimu iha tabela salariál karreira rejime jerál nian. Valór ba pagamentu estraordináriu ne'e la bele liu saláriu Prezidente Repúblika nian.
Aleinde pagamentu estraordináriu ne'e, diploma ida-ne'e mós estabelese konsesaun suplementu remuneratóriu ida kona-ba prosesu preparasaun Orsamentu Jerál Estadu ba tinan 2024 no taka ezersísiu orsamentál ba tinan 2023. Suplementu ida ne'e sei fó ba traballadór sira husi Ministériu Finansas ne'ebé halo papél esensiál ka substansiál iha prosesu refere, la haree ba ninia tipu vínkulu. REMATA
