Governu Timor-Leste

Primeiru-Ministru, Kay Rala Xanana Gusmão, hala’o sorumutuk, iha loron 17 fulan-dezembru tinan 2023, ho eis-Embaixadór no atuál Konsul Onoráriu Jerál Japaun nian iha Timor-Leste, I Wao Kitahara, no Profesór Yamada Yutsuya husi Universidade Waseda Japaun, hodi hametin kooperasaun no diskute oportunidade hodi promove dezenvolvimentu nasionál. 

I Wao Kitahara no Profesór Yamada Yutsuya rekoñesidu hanesan amigu di'ak ida Timor-Leste nian ne’ebé iha dedikasaun, ne'ebé kontribui ho ativu ba prosesu konstrusaun Estadu Timor-Leste. Durante sorumutuk ne'e, sira diskute kona-ba prosesu dezenvolvimentu nasionál daudaun ne’e, nune’e mós presiza apoiu husi parseiru dezenvolvimentu sira atu hametin rekursus umanus iha país ne'e no garante futuru ida ne’ebé prósperu. 

Iha sorumutuk ne'e, Primeiru-Ministru hato’o agradesimentu no rekoñesimentu ne’ebé kle’an ba I Wao Kitahara no Yamada Yutsuy, ba sira-nia kontribuisaun durante ne’e ba dezenvolvimentu Timor-Leste nian.

Governu Timor-Leste nomeia I Wao Kitahara hanesan Konsul Onoráriu Jerál Japaun ba Timor-Leste, ho objetivu atu promove Timor-Leste iha setór oioin no dezenvolvimentu ekonómiku nasionál, inklui ligasaun entre setór privadu no organizasaun sira seluk, iha área sira hanesan turizmu, peskas, agrikultura, promosaun kafé Timor nian iha merkadu Japaun, no área importante sira seluk. 

Akompaña Primeiru-Ministru iha sorumutuk ida-ne'e maka Vice-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vice-Ministra Asuntus ASEAN, Milena Maria da Costa Rangel, no Embaixadór Timor-Leste iha Japaun, Ilídio Ximenes da Costa.