Sidadaun timoroan sira ne’ebé daudaun ne’e hela iha Israel seguru hela no Governu buka hela dalan atu haruka sira fila hikas mai Timor-Leste
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, loron 13 fulan-outubru tinan 2023
Komunikadu Imprensa
Sidadaun timoroan sira ne’ebé daudaun ne’e hela iha Israel seguru hela no Governu buka hela dalan atu haruka sira fila hikas mai Timor-Leste
Governu Timor-Leste informa katak, maske iha eskala konflitu entre Israel no territóriu Palestinianu foin lalais ne’e, ne’ebé Hamas maka hahú uluk halo atake kontra sidade sira Israel nian, sidadaun timoroan na’in-51 ne’ebé daudaun ne’e iha Israel hodi tuir Kursu Agrikultura no Ortikultura, iha Sentru Internasionál Formasaun Agríkola Arava (AICAIT), seguru hela.
Governu Timor-Leste garante katak sei mantein kontaktu regulár ho sidadaun hirak-ne’e, ho fornesimentu informasaun atualizada no halo koordenasaun ne’ebé metin ho autoridade relevante hodi garante seguransa ba sira.
Informa mós katak, Governu halo koordenasaun ho entidade kompetente no parseiru sira, buka hela meius ne’ebé presiza hodi haruka fila hikas sidadaun timoroan sira iha Israel mai Timor-Leste ho seguru.
Nafatin halo vijilánsia ba situasaun ne’e, sei sai nafatin prioridade ida ba Governu Timor-Leste, ne’ebé sei foti medidas adisionais, karik presiza, hodi asegura moris-di’ak ba ninia sidadaun sira iha Israel.
Portavós Governu, Ministru Agio Pereira, afirma katak, “ami komprometidu tebes hodi garante seguransa no moris-di’ak ba ami-nia sidadaun sira iha Israel” no hatutan katak “Governu serbisu hela ho ativu hodi kria kondisaun sira ne’ebé presiza atu haruka fila hikas sidadaun timoroan sira mai Timor-Leste, liuhosi kolaborasaun ne’ebé metin ho autoridade relevante sira”. REMATA
