Primeiru-Ministru Taur Matan Ruak dezloka ba Labuan-Bajo, Indonézia atu partisipa iha Simeira ASEAN ba dala-42

Ter. 09 maiu 2023, 23:54h
345880409_968500731130280_524929462022558586_n

Primeiru-Ministru Taur Matan Ruak ho delegasaun, tersa ohin husik Timor-Leste, hodi dezloka ba Labuan-Bajo, Provínsia NTT-Indonézia ho Aviaun Aero Dili, iha ámbitu atu partisipa iha Simeira ASEAN ba dala-42 ne’ebé sei realiza hosi loron 09 to’o 11 fulan-maiu, tinan 2023, ne’ebé sei lidera hosi Indonézia.

Primeiru-Ministru Taur Matan Ruak hetan konvite ofisiál hosi Prezidénsia ASEAN, Indonézia, hodi reprezenta Estadu no Governu Timor-Leste iha Simeira ASEAN nian ba dahuluk nu’udar membru Paízes ba dala 11 ho estatutu observador, hafoin hetan admisaun ho unanimidade hosi Paízes membru 10 ASEAN iha fulan-novembru, tinan 2022 liuhosi Simeira ba dala-41 iha Phnom Penh, ne’ebé Prezidénsia hosi Reinu Kamboja. 346040618_627144942652933_7981331465560887944_n

Iha marjen Simeira ASEAN nian ne’e, Xefe Governu Timoroan mós sei hola oportunidade hodi hala’o enkontru ho Xefe Estadu no Xefe Governu hosi Paízes membru ASEAN nian, hodi buka hametin relasaun no kooperasaun tantu bilateral no multilateral iha Rejiaun ASEAN nian.

Xefe Governu ho delegasaun sei to’o fali rai-laran iha loron 11 fulan-maiu, tinan 2023.

   Ba leten