Governu reafirma kompromisu sira iha Loron Internasionál Feto nian

Prezidénsia Konsellu Ministrus

VIII Governu Konstitusionál

...........................................................................................................................

loron 8, fulan-marsu, tinan 2023

Komunikadu Imprensa

Governu reafirma kompromisu sira iha Loron Internasionál Feto nian

Iha Loron Internasionál Feto nian ne’e, Governu Konstitusionál VIII hato’o parabéns ba feto hotu-hotu iha Timor-Leste no afirma filafali kompromisu atu nafatin dezenvolve polítika sira hodi aumenta partisipasaun feto, iha área sira sosiedade nian, ne’ebé inklui polítika, empregu, edukasaun no saúde.

Feto sira dezempeña ona papél fundamentál ida iha istória ita-nia nasaun nian no sira kontinua hala’o papél ne’e iha tempu agora no ba iha futuru, tanba ne’e, iha loron ida-ne’e, Governu afirma filafali ninia kompromisu hodi promove no proteje direitu ba feto sira iha Timor-Leste no kontinua luta ba mundu ida ne’ebé justu no ekuitativu liu ba sidadaun sira hotu.

Portavós Governu Konstitusionál VIII, Ministru Fidelis Magalhães salienta importánsia “loron ida-ne’e fó hanoin hikas mai ita, objetivu husi ita-nia independénsia, ne’ebé atu kria kondisaun sira ba moris ida dignu ba timoroan hotu, timoroan feto no mane sira” no nia rekoñese “katak sei iha dalan ida ne’ebé naruk, ita tenke liu hodi alkansa partisipasaun no envolvimentu másimu feto nian iha prosesu dezenvolvimentu no atu ita bele atinje ita-nia objetivu finál”.

Ministru ne’e manifesta mós ninia fiar “katak tinan-tinan ita bele hadi’a investimentu no igualdade oportunidade nian ba feto sira hotu” no garante katak “instituisaun hotu-hotu Estadu nian kontinua sensivel ba partisipasaun feto nian iha vida polítika, ekonómika, sosiál iha ita-nia país”. REMATA

   Ba leten