Toleránsia Pontu ba loron 22 fulan-fevereiru ba okaziaun selebrasaun loron “Kuarta-Feira Sinzas”

Prezidénsia Konsellu Ministrus

VIII Governu Konstitusionál

...........................................................................................................................

loron 21 fulan-fevereiru tinan 2023

Komunikadu Imprensa

Toleránsia Pontu ba  loron 22 fulan-fevereiru ba okaziaun selebrasaun loron “Kuarta-Feira Sinzas” 

Ho konsiderasaun katak alínea a) husi n.2 husi artigu da-7 Lei n.10/2005, loron 10 fulan-agostu, ne’ebé halo ona alterasaun husi Lei n.3/2016, loron 25 fulan-maiu, prevee katak bele fó toleránsia pontu ba okaziaun data ofisiál komemorativa nian;

Ho konsiderasaun katak alínea a) husi n.2 husi artigu 5 Lei n.10/2005, loron 10 fulan-agostu, ne’ebé halo ona alterasaun husi Lei n3/2016, loron 25 fulan-maiu, hatuur loron “Kuarta-Feira Sinzas” hanesan data ofisiál komemorativa, ho data variavel;

Ho konsiderasaun katak tinan ida-ne’e, loron “Kuarta-Feira Sinzas” sei monu iha  loron 22 fulan-fevereiru;

Ho konsiderasaun ba importánsia ne’ebé selebrasaun loron “Kuarta-Feira Sinzas” nian iha ba fi’ar-na’in lubun boot ida, ne’ebé partisipa iha númeru boot iha serimónia relijioza sira ne’ebé realiza iha okaziaun ba selebrasaun importante ida-ne’e nian.

Ho konsiderasaun ba prátika ne’ebé ema halo tuir nanis ona iha tempu uluk;

Ho konsiderasaun katak, ho dispostu husi alínea d) husi n.6 husi artigu da-7 Lei n. 10/2005, loron 10 fulan-agostu, ne’ebé altera ona husi Lei n. 3/2016, loron 25 fulan-maiu, kompete ba Primeiru-Ministru atu fó toleránsia pontu ba “funsionáriu no ajente sira husi ministériu no servisu sira ne’ebé depende ba ministériu sira-ne’e, nune’e mós institutu no organizmu sira.

Nune’e, bazeia ba dispostu husi alínea a) husi n. 2 no iha alínea d) husi n.6, alínea rua ne’e hotu, husi artigu da-7 Lei n. 10/2005, loron 10 fulan-gostu, ne’ebé altera ona husi Lei n.3/2016, loron 25 fulan-maiu, Primeiru-Ministru determina tuirmai:

1.     Fó toleránsia pontu iha loron 22 fulan-fevereiru tinan 2023, durante loron tomak;

2.     Despaxu ida-ne’e abranje ba funsionáriu, ajente no traballadór sira hotu ne’ebé hala’o knaar iha servisu administrasaun direta Estadu nian, tantu sentrál ka deskonsentradu sira, no mós iha organizmu administrasaun indireta Estadu nian;

3.     La inklui iha númeru anteriór rekursus umanus husi servisu públiku sira ne’ebé, tanba natureza husi atividade sira ne’ebé sira dezenvolve, tenke hala’o nafatin serbisu durante períodu ne’e;

4.     Sein prejuízu ba kontinuidade no kualidade husi servisu públiku ne’ebé mak atu presta, dirijente másimu sira husi servisu sira ne’ebé temi ona iha númeru anteriór tenke fó dispensa ne’ebé hanesan husi devér asiduidade nian ba funsionáriu sira ne’e, iha loron seluk, ne’ebé sei determina bazeia ba oportunidade. REMATA

   Ba leten