Governu Timor-Leste

Iha tinan hirak ikus ne’e Timor-Leste mantein tendénsia iha kombate ba korrupsaun, ne’ebé sa’e ba pozisaun da-77 iha índise Persesaun Korrupsaun, (CPI, sigla iha lian inglés), ne’ebé elabora husi organizasaun naun governamentál (ONG) Transparénsia Internasionál, hodi alkansa pontu 42, tuir relatóriu ne’ebé fó-sai iha loron-tersa, loron 31 fulan-janeiru tinan 2023.

Iha tina liman ikus ne’e, Timor-Leste sa’e ona ba pontu hitu iha Índise Persesaun Korrupsaun nian, hodi okupa iha metade dahuluk husi país sira menus korruptu iha Ázia-Pasífiku, ba da-14 entre país 31 ne’ebé konsideradu iha rejiaun.

Entre país sira iha ASEAN, Singapura (5) no Malázia (61) de’it maka iha Timor-Leste nia leten no entre país membru sia hosi CPLP, Portugál (33) Kabu Verde (35) São Tomé e Prínsipe (65) de’it maka sira-nia pozisaun iha Timor-Leste nia leten.

CPI ne’e hanesan ferramenta medisaun korrupsaun nian ne’ebé antiga no kompleta liu iha mundu, hodi analiza nivel sira korrupsaun nian iha setór públiku husi país 180 no territóriu, hodi fó valór ba sira husi 0 (ne’ebé konsidera korruptu tebes) to’o 100 (transparente tebes), tuir persesaun espesialista no ezekutivu negósiu sira nian kona-ba nivel korrupsaun iha setór públiku.