Nota Pezar ba Falesimentu husi Monseñór José António da Costa nian
Prezidénsia Konsellu Ministrus
VIII Governu Konstitusionál
...........................................................................................................................
loron 28, fulan-dezembru, tinan 2022
Komunikadu Imprensa
Nota Pezar ba Falesimentu husi Monseñór José António da Costa nian
Ho laran triste boot tebes no sentimentu ne’ebé kle’an, bainhira Governu Repúblika Demokrátika Timor-Leste simu notísia kona-ba falesimentu Monseñór José António da Costa, Pároku Sé Katedrál Dili no Vigáriu Jerál Arkidioseze Dili nian.
Monseñór José António da Costa mate madrugada ne’e, iha loron 28 fulan-dezembru tinan 2022, iha Hospital Nacional Guido Valadares, iha Dili, hafoin moras kleur.
Iha momentu triste ida ne’ebé kle’an ba relijiozu no povu timoroan tomak ein jerál, Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu tomak nia naran, hato’o sentidas kondolénsias ba família estimadu Padre José António da Costa nian no ba Igreja katólika Timor nian. REMATA
