Loron Nasionál Tais
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Loron 14 fulan-dezembru tinan 2022
Loron Nasionál Tais
Governu Konstitusionál VIII, hato’o parabéns ba populasaun hotu ne’ebé ohin bada uluk komemora Loron Nasionál Tais nian.
Ohin, loron 14 fulan-dezembru tinan 2022, marka tinan ida dezde klasifikasaun Tais, hena tradisionál Timor-Leste nian, nu’udar Patrimóniu Imateriál Umanidade husi UNESCO.
Tais hanesan marka espresaun kulturál imateriál timoroan nian no dezempeña papél inestimável iha rituál komunidade no iha atividade ekonómika no sosiál Timor-Leste nian.
Utilizasaun Tais importante tebes iha serimónia omenajen, festa, rituál kulturál no relijiozu. Tuir tradisaun, Tais ne’e prodús ho liman inan-feton sira nian, ai-ne’ebé uza hodi soru, husi kabas ne’ebé ho kór naturál.
Portavós Governu VIII nian, Ministru Fidelis Manuel Leite Magalhães, lori naran Governu no Konsellu Ministrus, felisita povu timoroan ba selebrasaun loron ida ne’e, liuliu sira ne’ebé kontinua hodi prezerva, defende no valoriza Tais, hodi hatutan ba jerasaun foun, sira-nia koñesimentu no téknika sira, ne’ebé permite hodi prezerva no valoriza patrimóniu kulturál nasionál importante ida ne’e.
Ministru Fidelis defende mós katak aleinde prezerva Tais no sira nia uzu tradisional, tenke fomenta mós sira nia transformasaun no modernizasaun, liuhusi kriasaun produtu foun hanesan moda, dekorasaun no sira seluk tan. REMATA
