Semináriu nasionál Sidadaun nia Asesu ba Meiu Komunikasaun Sosiál
Governu Konstitusional da VIII, liuhusi Ministériu Asuntus Parlamentares no komunikasaun Sosiál (MAPKOMS), Diresaun Nasionál Diseminasaun ba Informasaun (DNDI), Departamentu Peskiza Análize no Média (DPAM), sei realiza iha loron 10 fulan-novembru tinan 2022, semináriu nasionál hodi aprezenta rezultadu peskiza ho tema “Sidadaun nia Asesu ba Meiu Komunikasaun Sosiál”.
Peskiza publiku nia asesu ba meiu komunikasaun sosiál ne’e hala’o bazeia ba planu ne’ebé haktuir iha planu asaun anuál tinan 2021 no 2022 DNDI nian, iha programa Garantir à Liberdade de Expressão e Acesso à Informação ho nia Sub-programa Disseminação de informação sobre ação governativa e do programa de desenvolvimento no atividade Pesquisa Index Público Acesso aos Meios de Comunicação Social.
Peskiza ida ne’e hahú hala’o iha fulan-maiu tinan 2021 no remata iha fulan-agostu tinan 2022. Prosesu rekolla dadus hala’o ho durasaun tinan ida no hala’o iha munisípiu 13 no RAEOA, iha postu 27 no suku 101. Objetivu husi peskiza ida ne’e buka hatene públiku nia utilizasaun ba meiu komunikasaun sira no públiku nia asesu ba informasaun kona-ba programa Governu da-ualu nian.
Nune’e mós husi peskiza ne’e atu kria baze dadus nasionál ba opiniaun públiku nia asesu informasaun iha meius komunikasaun, hodi propoin polítika ne’ebé adekuadu no inovativu ba necessidade. Aleinde ne’e, iha trajetu peskiza ne’e ba populasaun hotu iha territóriu laran tomak ho idade hahú husi tinan 15 ba leten. Durante peskiza DPAM hala’o kordenasaun ho Autoridade lokál sira hanesan, prezidente autoridade munisípiu, administradór postu, xefe suku sira no enumerádor sira hetan mós apoiu husi jestór rádiu komunidade sira, liu-liu jestór rádiu Iliwai Manatuto, jestór rádiu Povu Vikeke no jesór rádiu Komunidade Mauloko-Maubisse.
Semináriu ne’e hala’o iha Salaun Delta Nova, Komoro-Dili, konvidadu sira ne’ebé sei partisipa iha semináriu ida ne’e hamutuk ema na’in atus tolu mai hosi membru Governu, membru Parlamentu Nasionál, autoridade lokál, organizasaun naun-governamentál, instituisaun mídia sira, ajénsia nasionál no internasionál sira, no mós reprezentante estudante universitáriu sira.
