Votu Pezár ba Jape Kong Su nia mate
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Votu Pezar ba Jape Kong Su nia mate
Governu Konstitusionál VIII, iha sorumutuk Konsellu Ministrus loron 28 fulan-setembru tinan 2022, aprova ona votu pezár ida ba Jape Kong Su nia mate, iha loron segunda-feira liubá, iha Austrália ho idade 97.
Emprezáriu timoroan ne’e moris iha Balibó, munisípiu Bobonaru no durante tinan barak nia hela iha Maubara, munisípiu Likisá. Husikedas independénsia nasionál, nia dezenvolve ona projetu no emprendimentu barak, iha ne’ebé destaka sentru komersiál Timor Plaza.
Primeiru-Ministru, Taur Matan Ruak, iha nota pezár ne’ebé dedika ba família no ba belun sira hotu “saudozu Avó Jape” nian, lori ninia naran rasik no mós lori Governu Konstitusionál VIII nia naran, espresa, “ho ninia mate hanesan legadu boot husi Timoroan ida, ne’ebé dedika tebes nia an ba serbisu, ba família, ba funsionáriu no ba empreza sira ne’ebé durante nia moris tomak nia halo ona ba país barak, maibé, liuliu ninia paixaun no dedikasaun ne’ebé boot liu ba dezenvolvimentu ita-nia país.”
Xefe Governu salienta katak “maske nia hela iha Austrália, no ninia negósiu iha ne’ebá, ho ligasaun iha Xina no iha Singapura, nia la laran rua atu fila fali ba nia rai moris-fatin Timor-Leste iha tinan 1999, hafoin kedas Referendu Independénsia Nasionál, hodi partisipa iha prosesu rekonstrusaun nasionál ne’ebé difisil, iha momentu ne’ebé Sidade Kapitál Dili hetan estragu totál.”
Taur Matan Ruak afirma, “iha tinan ruanulu ikus Restaurasaun Independénsia Nasionál nian, Avó Jape Kong Su hanesan fonte enkorajamentu no inspirasaun ida mai ami hodi hatudu importánsia família nian, sidadania ativa no partisipativa, ba dezenvolvimentu projetu no investimentu foun sira, ho relevánsia ekonómika no nasionál, iha ne’ebé destaka ezemplu importante husi emprendimentu Timor Plaza nian, no seluk-seluk tan”.
Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu tomak nia naran, hato’o sira-nia sentidas kondolénsias ba família no belun sira Jape Kong Su nian no afirma katak “ninia kontribuisaun ba dezenvolvimentu nasionál ami sei la haluha”. REMATA
