Sorumutuk Konsellu Ministrus nian iha loron 17 fulan-agostu tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 17 fulan-agostu tinan 2022
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, kona-ba alterasaun dahuluk ba Dekretu-Lei n.15/2017, loron 17 fulan-maiu, ne’ebé kria no define estrutura orgánika Institutu Nasionál Administrasaun Públika nian (INAP).
Diploma ida-ne’e ho intensaun atu atribui ba institutu públiku ida-ne’e, tuir Programa Governu nian, responsabilidade ne’ebé boot liu kona-ba formasaun ne’ebé kualifikada ba rekursus umanus iha Administrasaun Públika, liuliu hodi fó programa sira lideransa nian no programa kapasitasaun avansada iha Administrasaun Públika. Nune’e, misaun foun INAP nian kona-ba formasaun profisionál iha Administrasaun Públika ne’e ho objetivu atu reforsa formasaun profisionál hanesan instrumentu estratéjiku ba modernizasaun no transformasaun Administrasaun Públika, liuhusi estabelesimentu área estratéjika sira formasaun nian.
...…
Konsellu Ministrus aprova mós projetu Dekretu-Lei, ne’ebé aprezenta husi Ministru Obras Públikas, Abel Pires da Silva, kona-ba alterasaun daruak ba Dekretu-Lei n. 8/2019, loron 24 fulan-abril, ho redasaun ne’ebé mai husi ninia alterasaun dahuluk, ne’ebé aprova ona liuhusi Dekretu–Lei n. 50/2022, loron 14 fulan-outubru, kona-ba Orgánika Ministériu Obras Públikas nian.
Ho konsiderasaun ba tomada pose titulár foun ida Ministériu Obras Públikas nian, ho intensaun atu halo alterasaun sira ne’ebé presiza hodi organiza filafali servisu balun ne’ebé inklui iha Ministériu, atu fó efisiénsia boot liután iha ezekusaun ba ninia atribuisaun sira.
Nune’e, halo divizaun ba Diresaun Jerál Administrasaun no Finansas ba diresaun rua ho vokasaun sira ne’ebé lahanesan. Ida haree liu ba ezekusaun orsamentál ne’ebé inklui Diresaun Nasionál Aprovizionamentu no Orsamentu no Finansas, iha ne’ebé inklui mós Unidade Planeamentu Estratéjiku, ne’ebé ba oin sei sai hanesan diresaun nasionál. Daruak haree liu ba kestaun administrasaun jerál rekursu sira Ministériu nian, iha ne’ebé inklui Diresaun Nasionál Administrasaun no Jestaun Patrimóniu no Rekursus Umanus, aumenta mós Diresaun Nasionál Teknolojia Informasaun nian, ne’ebé ho objetivu atu fó apoiu ida ba dijitalizasaun serbisu sira iha Ministériu.
Hasai mós Diresaun Jerál sira ne’ebé hakotu tiha ona ho nomeasaun ba órgaun diretivu empreza públika sira, Bee Timor-Leste, E.P. no Eletrisidade de Timor-Leste, E.P.
Diresaun Nasionál Estrada, Ponte no Kontrolu ba Inundasaun fahe mós ba diresaun nasionál rua; ida haree liu ba estrada, ponte no ida seluk haree ba prevensaun no kontrolu ba bee-sa’e hodi nune’e Ministériu bele iha entidade ida ho kompeténsia espesífika atu hamenus risku inundasaun nian ne’ebé akontese ba beibeik, tanba alterasaun klimátika sira.
......
Konsellu Ministrus aprova projetu Dekretu-Lei relasiona ho Informasaun Kadastrál Prediál, ne’ebé aprezenta husi Ministru Justisa, Tiago Amaral Sarmento. Projetu Dekretu-Lei ida-ne’e nian sai ona hanesan objetu deliberasaun iha sorumutuk Konsellu Ministrus iha loron 8 fulan-juñu tinan 2022, maibé, tanba desizaun hodi altera artigu 46, kona-ba data ne’ebé tama ba vigór diploma nian, presiza submete projetu Dekretu-Lei ida-ne’e nian ba deliberasaun foun. Nune’e, sei define katak diploma ne’e tama iha vigór iha loron 01 fulan-novembru tinan 2022, uluk define katak diploma ne’e sei tama iha vigór iha loron 120 hafoin ninia publikasaun.
…
Ministru Administrasaun Estatál, Miguel Pereira de Carvalho no Vise-Ministru Administrasaun Estatál, Lino de Jesus Torrezão, aprezenta ba Konsellu Ministrus Relatóriu Misaun nian hodi Apoia Prosesu Resenseamentu Eleitorál iha Giné-Bissau. Delegasaun timoroan, lidera husi Vise-Ministru, Lino de Jesus Torrezão, vizita ona Giné-Bissau iha loron 22 fulan-jullu to’o loron 8 fulan-agostu, hodi halo sorumutuk ho autoridade lokál sira hodi verifika kondisaun sira ne’ebé iha no identifika nesesidade sira ba organizasaun resenseamentu eleitorál no realizasaun ba eleisaun livre no demokrátika nian sira iha Giné-Bissau, ne’ebé sei hala’o iha loron 18 fulan-dezembru oinmai.
...…
Ikusliu, Ministru Petróleu no Minerais, Victor da Conceição Soares no responsavel sira husi ANPM, Timor Gap no IPG, halo aprezentasaun ida kona-ba progresu sira iha setór petróleu no minerais. Aprezentasaun ne’e ho nia objetivu atu fó vizaun jerál ida ba membru sira Konsellu Ministrus nian, kona-ba atividade prinsipál sira ne’ebé planeia ka realiza tiha ona, atu haforsa indústria petrolífera nasionál. REMATA
