Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 13 fulan-jullu tinan 2022

Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé aprezenta husi Ministru Defeza, Filomeno da Paixão de Jesus, kona-ba Estatutu Orgániku Unidade Falintil nian, hodi estabelese ninia estrutura no atribuisaun. Unidade Falintil ne’e, integra ona iha estrutura sentrál FALINTIL-Forsas Defeza Timor-Leste, hanesan Unidade Operasaun Espesiál ida. Ninia misaun prinsipál mak atu forma militár sira iha área espesífika operasaun espesiál nian no hodi prepara Forsa Operasaun Espesiál ida. Forsa espesiál ida ne’e sei iha número efetivu ne’ebé ki’ik, organizasaun di’ak liu no sei harii hosi pesoál ne’ebé selesiona, treina no ekipa ho di’ak. Ninia objetivu maka atu hala’o operasaun iha kondisaun fízika no psikolójika ne’ebé ezijente, nune’e bele kumpre misaun sira ne’ebé ezije téknika no atuasaun ne’ebé la konvensionál.

Konsellu Ministrus mós aprova ona projetu Dekretu-Lei, ne’ebé aprezenta husi Ministru Turizmu, Komérsiu no Indústria, José Lucas do Carmo da Silva, ba kriasaun Sosiedade Anónima Kapitál Públiku JESPIN – Jestaun Parke Industriál, SA. Ho objetivu atu promove atividade inisiativa privada iha setór industriál, Governu hakarak atu kria sosiedade anónima kapitál públiku nian ida-ne’e, ne’ebé sei responsavel ba promosaun, instalasaun no jestaun ba parke industriál sira.

Konsellu Ministrus mós aprova ona projetu Rezolusaun Governu nian, ne’ebé aprezenta husi Vise-Primeiru-Ministru, Ministru Planu no Ordenamentu, José Maria dos Reis, ne’ebé ho objetivu atu kria Komisaun Interministeriál Koordenadora ba Kriasaun Laboratóriu Nasionál Enjeñaria Timor-Leste nian, ho responsabilidade atu aprezenta ba Konsellu Ministrus, iha prazu fulan tolu, Planu Mestre  Kriasaun Laboratóriu Nasionál Enjeñaria Timor-Leste nian. Komisaun ne’e, prezide husi Vise-Primeiru-Ministru, no mós kompostu husi Ministru Obras Públikas no husi Ministru Ensinu Superiór, Siénsia no Kultura.

Konsellu Ministrus aprova ona projetu Rezolusaun Governu nian, ne’ebé aprezenta husi Ministru Administrasaun Estatál, Miguel Pereira de Carvalho, kona-ba Misaun hodi apoia prosesu resenseamentu eleitorál iha Giné-Bissau. Rezolusaun Governu ne’ebé aprova nomeia Lino de Jesus Torrezão hanesan Reprezentante Espesiál Governu Timor-Leste nian ba Governu Giné-Bissau hodi halo identifikasaun ba nesesidade Estadu ida-ne’e hodi hala’o eleisaun ne’ebé livre no justa, iha loron 18 fulan-dezembru tinan 2022 mai.

Konsellu Ministrus autoriza Ministru Agrikultura no Peskas hodi asina memorandu entendimentu ida kona-ba kooperasaun agríkola ho Ministériu Agrikultura Repúblika Indonézia nian, ho objetivu atu loke tan kuadru ezistente kooperasaun bilaterál nian iha setór agríkola, inklui área téknika no sientífika.

Ministru Turizmu, Komérsiu no Indústria, José Lucas do Carmo da Silva, simu autorizasaun husi Konsellu Ministrus hodi asina memorandu entendimentu rua ho Governu Indonézia,  ida iha área komérsiu nian no ida seluk kona-ba padronizasaun, avaliasaun konformidade no metrolojia nian.

Konsellu Ministrus autoriza Ministru Transportes no Komunikasoins, José Agustinho da Silva, hodi asina memorandu entendimentu ida ho Ministériu Transportes Repúblika Indonézia nian kona-ba Movimentu Transfronteirisu Autokarru Komersiál nian. Memorandu ida-ne’e ho objetivu atu apoia komérsiu transfronteirisu no kooperasaun entre nasaun rua ne’e, no fó dalan atu promove, dezenvolve no reforsa komérsiu, investimentu, turizmu no interkámbiu kulturál entre nasaun rua ne’e, liuhusi estabelesimentu sistema transporte nian ida ne’ebé integradu no efisiente ne’ebé bele insentiva kreximentu no dezenvolvimentu ekonómiku iha Timor-Leste, maibé mós fó benefísiu ba Indonézia.

Ministru Transportes no Komunikasoins hetan mós autorizasaun husi Konsellu Ministrus hodi asina memorandu entendimentu entre ninia ministériu no Ajénsia Meteorolojia, Klimatolojia no Jeofízika Repúblika Indonézia nian kona-ba kooperasaun iha área meteorolojia, klimatolojia no jeofízika nian. Parseria ne’ebé prevee iha memorandu ida-ne’e, ho objetivu atu apoia dezenvolvimentu  meteorolojia, klimatolojia no jeofízika nian, setór ne’ebé importante tebetebes ba Timor-Leste, liuliu iha área sira hanesan kalibrasaun ba ekipamentu meteorolójiku no sismolójiku no kapasitasaun ba rekursus umanus.

Konsellu Ministrus mós autoriza Ministru Transportes no Komunikasoins hodi asina memorandu entendimentu ida ho Ministériu Komunikasoins no Informátika Repúblika Indonézia nian, ba kooperasaun iha área komunikasoins no informátika. Habelar no hadi’a setór komunikasoins no informátika nian implika kolaborasaun ho nasaun sira seluk hodi nune’e nasaun rua ne’e ho proativu no asertivu, bele aumenta sira-nia efikásia atuasaun interna no esterna nian no situasaun ne’e presiza estabelese baze koordenasaun no kooperasaun bilaterál iha kampu komunikasoins no informátika nian.

Konsellu Ministrus mós aprova ona projetu Dekretu-Lei, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, kona-ba medida apoiu nian hodi dezloka estudante timoroan sira ne’ebé frekuenta ensinu superiór iha estranjeiru atu filafali mai Timor-Leste ka hodi sai ba estranjeiru iha situasaun pandemia, epidemia, dezastre naturál ka katástrofe, moras todan ka konflitu armadu nian. Ho aprovasaun hosi diploma ida-ne’e, haree ba situasaun sira ne’ebé akontese, Estadu sei fasilita viajen ne’ebé presiza hodi estudante sira ho nasionalidade timoroan ne’ebé ho ativu frekuenta hela ensinu superiór iha estranjeiru, instituisaun ensinu superiór ne’ebé hetan akreditasaun bele fila mai Timor-Leste, ka ninia viajen ba fatin iha ne’ebé sira sei frekuenta sira-nia estudu iha ensinu superiór. Estadu sei selu viajen liuhusi transporte aéreu, marítimu ka rodoviáriu estudante nian durante ninia dezlokasaun filafali ka sai husi Timor-Leste nomós alojamentu ka hela temporáriu bainhira mosu evakuasaun, kuarentena ka halo tratamentu médiku ka ospitalar.

Ministru Finansas, Rui Augusto Gomes, simu autorizasaun hodi asina akordu projetu ida ho Ajénsia Kooperasaun Internasionál Koreia nian (KOIKA),” ba dezenvolvimentu projetu “YEES – Youth Employment and Entrepreneurship Skills (kompeténsia empreendedorizmu no empregu ba juventude). Tuir memorandu ida ne’e, Repúblika Koreia sei realiza kontribuisaun finanseira dolar amerikanu millaun neen, rihun atus-rua, atu finansia dezenvolvimentu joven sira nian hodi hetan abilidade, kompeténsia no koñesimentu atubele hetan serbisu, oferese servisu disponivel sira hodi fornese suporte olístiku iha aumentu ba kbiit serbisu nian no ajuda joven sira hodi hahú no habelar sira-nia negósiu. Projetu ne’e sei iha durasaun tinan neen, husi tinan 2022 to’o 2027 no sei implementa iha munisípiu haat, Dili, Baukau, Ermera no Likisá.

Konsellu Ministrus aprova ona projetu Dekretu-Lei ne’ebé halo alterasaun Orgánika Polísia Nasionál Timor-Leste (PNTL) nian. Projetu Dekretu-Lei ida-ne’e nian sai ona hanesan objetu deliberasaun iha sorumutuk Konsellu Ministrus iha loron 25 fulan-maiu tinan 2022, maibé tanba iha alterasaun balun iha faze redasaun finál nian, presiza submete projetu Dekretu-Lei ida-ne’e nian ba deliberasaun foun.

Aprova mós projetu Dekretu-Lei ne’ebé atu halo alterasaun daruak ba Dekretu-Lei n. 26/2021, loron 26 fulan-novembru, ne’ebé altera ona husi Dekretu-Lei n. 12/2022, loron 17 fulan-marsu, kona-ba medida exesionál no temporária vijilánsia sanitária nian hodi hatán ba pandemia moras COVID-19. Ho alterasaun ida-ne’e, medida exesionál sira sei prolonga to’o loron 13 fulan-novembru tinan 2022.

Ikusliu, Ministru Turizmu, Komérsiu no Indústria, José Lucas do Carmo da Silva, nu’udar Autoridade Nasionál ba Expo Dubai tinan 2020 (ANED-TL) no Koordenadór-Jerál ba Expo Dubai tinan 2020, Manuel Vong, halo aprezentasaun ba Konsellu Ministrus kona-ba rezultadu partisipasaun Timor-Leste nian iha Expo Dubai tinan 2020. Pavillaun Timor-Leste nian, iha espozisaun mundiál dahuluk hala’o iha médiu oriente, ho vizitante liu ema rihun 340, hahú husi loron 1 fulan-outubru to’o loron 31 fulan-marsu tinan 2022. Durante períodu ida-ne’e realiza ona asaun oin-oin marketing no promosaun nian iha área turizmu no ospitalidade, agrikultura no peskas, konetividade, lojístika no transporte no petróleu, gás no minerál hodi atrai investimentu mai Timor-Leste. Hala’o mós palestra no enkontru ho governante sira médiu oriente nian no reprezentante sira setór privadu nian. Durante eventu ne’e, asina mós akordu servisu aéreu nian ida ho Governu Emiradus Arábes Unidus. REMATA