Sorumutuk Konsellu Ministrus nian iha loron 22 fulan-juñu tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 22 fulan-juñu tinan 2022
Konsellu Ministrus hala’o sorumutuk iha Palásiu Governu, iha Dili, no aprova projetu Proposta Lei, ne’ebé aprezenta husi Ministru Administrasaun Estatál, Miguel Pereira de Carvalho, ba kriasaun Lei Finansas Munisipál nian. Lei ida-ne’e estabelese rejime enkuadramentu orsamentál, finanseiru no kontabilidade públika nian ba munisípiu sira. Hodi konsidera autonomia finanseira munisípiu sira nian, ne’ebé estabelese husi Lei 23/2021, loron 11 fulan-novembru, Lei Podér Lokál no Desentralizasaun Administrativa, projetu Proposta Lei ida-ne’e regula orsamentu munisipál sira.
Konsellu Ministrus delibera atu autoriza selebrasaun akordu kontribuisaun finanseira nian entre Governu Timor-Leste ho Ajénsia Japoneza ba Kooperasaun Internasionál (JICA), kona-ba programa reabilitasaun urjente ba infraestrutura sira ne’ebé aat kauza husi inundasaun. Kontribuisaun finanseira husi JICA ne’e ho valór besik dolar amerikanu US$ 7.400.000 (dolar amerikanu millaun hitu rihun atus haat). Konsellu Ministrus delibera ona hodi indika Ministru Finansas atu asina akordu ida-ne’e lori naran Governu Timor-Leste nian.
Konsellu Ministrus delibera mós atu autoriza selebrasaun akordu subsidiáriu entre Governu Timor-Leste no Governu Austrália, relasiona ho Programa Parseria ba Prosperidade Inkluziva (PROSIVU). Kontribuisaun finanseira husi Governu Austrália ne’e ho valór besik dolar amerikanu US$ 25.000.000 (dolar amerikanu millaun ruanulu-resin-lima), ne’ebé sei utiliza husi loron 1 fulan-jullu tinan 2022 to’o loron 30 fulan-juñu tinan 2026. Konsellu Ministrus delibera hodi indika Ministru Finansas atu asina akordu ne’e lori Governu Timor-Leste nia naran. REMATA
