Sorumutuk Konsellu Ministrus nian iha loron 13 fulan-abril tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 13 fulan-abril tinan 2022
Konsellu Ministrus hala’o sorumutuk iha Palásiu Governu, iha Dili no, delibera ona hodi autoriza prosedimentu aprovizionamentu nian, liuhosi konkursu públiku internasionál, ba adjudikasaun kontratu ezekusaun obra konstrusaun Unidade Pediatria nian no ba Kuidadu Koronáriu Intensivu sira iha Hospital Nasional Guido Valadares (HNGV). Projetu ida-ne’e aprezenta husi Ministra Saúde, Odete Maria Freitas Belo. Konstrusaun ba unidade foun ida-ne’e ho objetivu prinsipál atu hadi’a asesu no kualidade hosi kuidadu espesializadu sira ne’ebé presta iha HNGV, ho atensaun liuliu ba internamentu kazu sira emerjénsia no urjénsia pediátrika nian. Sei permite mós atu hadi’a ho di’ak liután resposta nasionál ba surtu esporádiku no emerjente sira dengue, kólera nian ka surtu sira seluk ho impaktu boot ba saúde públika, liuliu ba bebé ne’ebé foin moris, labarik no adolexente sira.
Aprova mós projetu deliberasaun nian, ne’ebé aprezenta husi Ministériu Planu no Ordenamentu, ba aprovasaun prosedimentu aprovizionamentu nian, liuhosi konkursu públiku internasionál, ba adjudikasaun kontratu públiku ida nian atu sosa no halo instalasaun ba ligasaun dijitál ida iha Timor-Leste, liuhusi kabu submarinu fibra ótika nian, ba sidade Darwin no Port Hedland, iha Commonwealth Austrália nian.
Ikusliu, Konsellu Ministrus aprova ona projetu Dekretu-Lei nian, ne’ebé aprezenta husi Ministru Petróleu no Minerais, Victor da Conceição Soares, ba atribuisaun subsídiu ba operadór transporte rodoviáriu públiku nian sira, ba operadór transporte aéreu no marítimu nasionál sira, no ba kompradór sira kombustivel nian ne’ebé destina ba atividade agríkola no peska nian.
Haree ba situasaun ne’ebé akontese iha Ukránia, ne’ebé provoka ona aumentu substansiál ida ba folin barríl petróleu nian, ho Diploma ida-ne’e hakarak atu garante estabilidade presu kombustivel nian no hodi evita konsekuénsia prejudisiál sira ba ekonomia no ba konsumidór sira. Tanba ne’e presiza intervensaun iha merkadu kombustivel nian, ho forma ne’ebé la hanesan baibain no tranzitóriu, atu hamenus impaktu hosi aumentu presu kombustivel nian sira, iha transporte públiku sira no iha atividade fundamentál sira-seluk ba ekonomia nasionál.
Subsídiu ne’ebé sei fó ba operadór transporte rodoviáriu públiku sira, ba operadór transporte aéreu no marítimuu nasionál sira no ba kompradór kombustivel ne’ebé maka destina ba atividade agríkola no peska nian, sei hanaran voucher kombustivel, subsídiu ne’e sei halo liuhusi vale deskontu nian ida atu uza iha estasaun sira ne’ebé maka fa’an kombustivel ho ninia montante ne’ebé korrespondente ba 100% husi valór diferensa nian entre folin médiu gazolina ka gazóleu litru ida nian, iha fulan-dezembru tinan 2021 no folin gazolina ka gazóleu litru ida nian iha data fó-sai voucher kombustivel nian, ho konsiderasaun ba tipu kombustivel nian no ninia karakterístika sira.
Diploma ne’e sei válidu to’o loron 31 fulan-jullu tinan 2022, bele mós prolonga, karik kondisaun exesionál ba aumentu presu iha merkadu kombustivel nian nafatin la estavel no la hanesan baibain. REMATA
