Governu Timor-Leste

Maria do Rosário Fátima Correia no Eldino Rodrigues dos Santos, ohin simu ona pose husi Prezidente Repúblika, Francisco Guterres Lú Olo, ida hanesan Sekretária Estadu ba Igualdade no Inkluzaun no ida seluk hanesan Sekretáriu Estadu Terras no Propriedades. Serimónia ne’e hala’o iha loron 31 fulan-marsu tinan 2022, iha Palásiu Prezidensiál Nicolau Lobato,

Primeiru-Ministru, Taur Matan Ruak, iha ninia intervensaun, hato’o ona saudasaun “inísiu funsaun Sekretária Estadu ba Igualdade no Inkluzaun no Sekretáriu Estadu Terras no Propriedades nian, ne’ebé hahú ohin loron, sira na’in rua integra an iha Governu Konstitusionál VIII”, “ne’ebé agora hasoru dezafiu foun sira ho responsabilidade no dinamizmu, atubele garante ba oportunidade ne’ebé hanesan ba sidadaun sira hotu, ba seguransa jurídika husi negósiu, investimentu no kompromisu hodi transforma Timor-Leste ba país ida ne’ebé Riku, Forte no Seguru liu”.

Taur Matan Ruak, hateten, “Ho serimónia ida ne’e, atu kompleta síklu remodelasaun governativa ne’ebé hahú iha loron 22 fulan-marsu tinan 2022 ho objetivu atu aproveita konjuntura ida ne’ebé pozitiva liu iha nivel rai-laran no rai-li’ur, hodi hasoru Normalidade Foun hafoin-COVID-19, ne’ebé ita hotu dezeja atu rekuperasaun ekonómika no sosiál bele aumenta, iha setór dezenvolvimentu nasionál sira hotu”.

“Iha momentu ne’ebé Governu hala’o balansu ba rezultadu sira ne’ebé alkansa ona no prepara revizaun ba Planu Estratéjiku Dezenvolvimentu Nasionál, ho introdusaun ba instrumentu foun sira planeamentu multianuál no ordenamentu territoriál nian”, Primeiru-Ministru aproveita “oportunidade katak serimónia ida ne’e fó biban atu renova determinasaun no empeñu [Governu nian] afavór ba sosiedade ida ne’ebé justa no inkluziva liu”.