Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Timor-Leste lamenta ho Madeleine Albright nia mate

Governu Timor-Leste, lori timoroan tomak nia naran, hato’o ninia votu pezár no kondolénsia ne’ebé kle’an ba família no belun sira Madeleine Albright nian, eis-Sekretária Estadu Governu Estadus Unidus Amérika nian, ne’ebé mate iha loron 23 fulan-marsu liubá, ho tinan 84, vítima ba kankru.

Madeleine Albright, nu’udar feto dahuluk Sekretária Estadu Estadus Unidus Amérika nian, kargu ne’ebé asume ona hosi tinan 1997 to’o 2001, durante governasaun eis-Prezidente Bill Clinton nian.

Primeiru-Ministru, Taur Matan Ruak, iha karta ida-ne’ebé haruka ba família, hato’o ona, lori Governu Konstitusionál VIII nia naran, “kondolénsias ne’ebé kle’an liu ba família, kolega no belun sira” Albright nian.

Xefe Governu ne’e destaka ona mós katak timoroan sira “sei nafatin hanoin fila-fali kona-ba Madeleine Albright ninia knaar importante apoiu no amizade nian ne’ebé nia fó ba kauza timoroan nian, durante hala’o nia knaar sira ne’ebé boot nu’udár Sekretária Estadu Governu Estadus Unidus Amérika nian, liuliu durante Konsulta Populár (Referendu) loron 30 fulan-agostu tinan 1999, no, tuirmai, to’o hapara violénsia, ne’ebé fó dalan atu ita konkista Restaurasaun ba Independénsia Nasionál, iha tempu ne’ebá, ne’ebé sei hala’o iha loron 20 fulan-maiu tinan 2002. REMATA