Nasoins Unidas no Programa Ai-han Mundiál nian hato’o parabéns no agradese ba solidariedade Timor-Leste nian ho povu ukranianu

Seg. 14 marsu 2022, 15:34h
275814105_273082704996494_7042955882931484248_n

Ministru Prezidénsia Konsellu Ministrus, Fidelis Manuel Leite Magalhães, iha loron 14 fulan-marsu tinan 2022, hala’o ona sorumutuk ho Koordenadór-Rezidente Organizasaun Nasoins Unidas (ONU) nian iha Timor-Leste, Roy Trivedy no ho Diretór Programa Ai-han Mundiál nian (PAM/WFP, World Food Programme) iha Timor-Leste, Dageng Liu.

Durante sorumutuk ne’e, Roy Trivedy no Dageng Liu, hato’o sira-nia parabéns no agradese ba Governu Timor-Leste ne’ebé deside ona iha Sorumutuk ikus Konsellu Ministrus nian, hodi halo doasaun ho valór dolar amerikanu millaun 1,5 hodi kontribui ba ajuda umanitária povu ukranianu nian.

Ema millaun 1,7 liu maka afeta husi konflitu hodi halai sai husi Ukránia, no  hamosu krize umanitária ne’ebé boot liu iha Europa hosikedas Funu Mundiál Daruak.

Koordenadór-Rezidente Nasoins Unidas nian salienta katak, Timor-Leste maka nasaun dahuluk husi sudeste aziátiku ne’ebé kontribui ona ho osan ba ajuda umanitária povu ukranianu nian.

Ministru Prezidénsia Konsellu Ministrus no responsavel rua Nasoins Unidas nian ne’e aborda mós seguransa ai-han nasionál nomós faze foun programa sesta bázika nian no oinsá atu promove produsaun lokál no diversifikasaun alimentár.

 

   Ba leten