Inisiativa limpeza jerál mantein no hala’o nafatin kada sexta-feira
Prezidénsia Konsellu Ministrus
VIII Governu Konstitusionál
..............................................................................................................................
Dili, loron 3, fulan-fevereiru, tinan 2022
Inisiativa limpeza jerál mantein no hala’o nafatin kada sexta-feira
Governu sei kontinua asaun limpeza jerál, ne’ebé sei hala’o husi funsionáriu órgaun no servisu administrasaun públika sira hotu iha nível nasionál. Inisiativa ne’ebé hahú ona iha semana kotuk, sei hala’o mós iha aban, loron 4 fulan-fevereiru tinan 2022, durante loron tomak no sei realiza iha kada sexta-feira.
Ministériu Administrasaun Estatál sei sai nu’udar responsável hodi divulga ba órgaun no servisu sira iha administrasaun públika nian, norma sira ne’ebé liga ba organizasaun no distribuisaun ekipa sira ba limpeza jerál.
Governu apela atu mobiliza populasaun hotu atu halo parte iha realizasaun asaun limpeza jerál iha fatin públiku, bairru no sira-nia hela-fatin.
Kampaña limpeza ida-ne’e hanesan parte husi medida sira atu kombate surtu denge ne’ebé hala’o ona husikedas fulan-dezembru tinan 2021, husi Ministériu Saúde no entidade governamentál no parseiru sira seluk.
To’o momentu ne’e rejista ona totál kazu hamutuk 1407 no mate 22, tuir dadus ne’ebé fó-sai horiseik husi Ministériu Saúde. Dili maka munisípiu ida-ne’ebé afetadu liu, ho totál kazu hamutuk 925.
Aleinde kuidadu sira ne’ebé adopta ba prevensaun denge nian, Governu apela ba populasaun atu mantein vijilante no adota mós medida preventiva sira ba COVID-19, ne’ebé haree ba númeru infetadu ho SARS-CoV-2 no propagasaun variante Omicron iha ita-nia rain ne’ebé daudaun sa’e maka’as.
Iha semana ikus ne’e, númeru kazu aumenta ho signifikante no dadus ne’ebé horiseik fó sai husi Ministériu saúde hatudu katak daudaun ne’e kazu ativu hamutuk ema na’in 268, entre númeru ne’e ema na’in 266 iha Dili.
Husikedas inísiu pandemia nian, Timor-Leste rejista kazu infesaun husi coronavírus hamutuk ema na’in 20136 no ema na’in 122 mate ona tanba infetadu ho SARS-CoV-2.
Governu apela ba populasaun hotu katak karik iha sintoma sira hanesan isin-manas, me’ar, kakorok moras, konstipasaun no difikuldade respiratória ka susar atu dada iis, bele ba iha sentru sira saúde nian atu halo lalais diagnóstiku ba moras, atu nune’e bele evita situasaun sira ne’ebé grave liu.
Husu mós ba ema sira hotu ne’ebé seidauk simu vasina, atu hakat ba postu sira vasinasaun nian hodi simu vasina kontra COVID-19. Ba sidadaun sira ne’ebé simu ona vasina, disponivel ona mós doze datoluk, iha sentru sira vasinasaun nian.
Atu impede propagasaun COVID-19, Governu apela ba sidadaun hotu nia kolaborasaun atu adopta medida sira prevensaun nian hanesan uza máskara, fase liman beibeik, evita atu tau liman ba oin, mantein distánsia pelumenus metru ida, liuliu ho ema sira seluk no evita halibur-malu ho ema barak. Remata
