Sorumutuk Konsellu Ministrus nian iha loron 2 fulan-fevereiru tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 2 fulan-fevereiru tinan 2022
Konsellu Ministru hala’o sorumutuk iha Palásiu Governu, iha Dili, no delibera atu propoin nomeasaun ba Filomeno Aleixo da Cruz, nu’udar Embaixadór Estraordináriu no Plenipotensiáriu Repúblika Demokrátika Timor-Leste nian ba Asosiasaun Nasaun Sudeste Aziátiku (ASEAN) iha Jakarta, tuir projetu ne’ebé aprezenta husi Ministra Negósius Estranjeirus no Kooperasaun, Adaljiza Albertina Xavier Reis Magno.
Aprova mós projetu proposta Rezolusaun Parlamentu Nasionál, ba ratifikasaun adezaun Timor-Leste nian ba tratadu kona-ba proibisaun arma nukleár sira, ne’ebé aprezenta mós husi Ministra Negósius Estranjeirus no Kooperasaun. Tratadu ida ne’e ho objetivu atu bandu uzu, dezenvolvimentu, produsaun, teste, armazenamentu, transferénsia no ameasa ba uzu arma nukleár sira, ho hanoin atu halakon arma nukleár sira hotu. REMATA
