Sorumutuk Konsellu Ministrus nian iha loron 26 fulan-janeiru tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 26 fulan-janeiru tinan 2022
Konsellu Ministrus hala’o sorumutuk iha Palásiu Governu, iha Dili no, aprova ona projetu Rezolusaun Governu nian, ne’ebé aprezenta husi Primeiru-Ministru, Taur Matan Ruak, ba nomeasaun Ageu Jorge Cardoso, hodi ezerse knaar hanesan Diretór Ezekutivu Ajénsia Nasionál Planeamentu, Monitorizasaun no Avaliasaun (ANAPMA) nian, iha rejime komisaun servisu, ho durasaun tempu tinan haat.
Tuirmai aprezentasaun ida husi Vise-Primeiru-Ministru no Ministru Planu no Ordenamentu, José Maria dos Reis, kona-ba Pontu situasaun ezekusaun ba projetu sira ne’ebé finansia husi Fundu Infraestrutura sira. Aprezenta ona rezultadu prinsipál sira husi jestaun no ezekusaun Fundu Infraestrutura sira Sekretariadu Grande Projetu (SGP) nian, husi servisu verifikasaun no inspesaun ne’ebé realiza husi Ajénsia Dezenvolvimentu Nasionál, I. P. (ADN), husi prosesu aprovizionamentu projetu sira fundu infraestrutura Komisaun Nasionál Aprovizionamentu (KNA) nian no mós implementasaun husi projetu sira resposta ba bee sa’e iha loron 4 fulan-abril nian, husi grupu serbisu tékniku. Membru sira Konsellu Ministrus nian, analiza ona mós dezafiu prinsipál sira ne’ebé maka hasoru no solusaun no rekomendasaun sira hodi hadi’a ezekusaun ba projetu sira ne’ebé finansia husi fundu infraestrutura sira. REMATA
