Votu Pezar ba D. Basílio do Nascimento nia mate

Prezidénsia Konsellu Ministrus

VIII Governu Konstitusionál

...........................................................................................................................

Dili, loron 30, fulan-outubru, tinan 2021

Komunikadu Imprensa

Votu pezár ba D. Basílio do Nascimento nia mate

Ho laran triste boot tebes no sentimentu ne’ebé kle’an,  Governu Repúblika Demokrátika Timor-Leste simu ona notísia kona-ba falesimentu D. Basílio do Nascimento, Bispu Baucau nian, ohin, loron 30 fulan-outubru tinan 2021, iha Hospital Nacional Guido Valadares, iha Dili, tanba moras fuan nian.

D. Basílio  do Nascimento moris iha loron 14 fulan-juñu tinan 1950 iha Suai, kapitál munisípiu Covalima nian.

Amu bispu D. Basílio simu ordenasaun saserdotál iha loron 26, fulan-juñu tinan 1977, iha Évora, Portugál. Hafoin nia ordenasaun saserdotál, nia ba Paris, iha Fransa, serbisu iha asisténsia relijioza ba imigrante sira. Nia hela iha Paris to’o tinan 1982 no durante períodu ida-ne’e nia konklui ona Lisensiatura iha Teolojia Pastorál no Katekeze iha Institutu Katóliku Paris nian no hetan ona diploma Literatura no Lian Franseza nian.

Iha tinan 1982, fila hikas ba Évora, iha ne’ebé nia sai hanesan responsavel ba parókia Cano no Casa Branca, iha Sousel, no parókia Santa Vitória do Ameixial, iha Estremoz.

Iha Évora, Dom Basílio hetan mos nomeasaun nu’udar membru husi ekipa formadora presemináriu  Vila-Viçosa,  Arquidiocese Évora nian. Nia mós sai  manorin teologia-pastorál iha Institutu Superiór Teolojia, diretór espirituál Semináriu Maiór Nosa Señora Purifikasaun, iha Évora, no sai mós hanesan responsavel diosezanu iha sekretariadu pastorál vokasaun sira nian.

Amu Bispu Dom Basílio fila mai Timor-Leste iha fulan-outubru tinan 1994, iha ne’ebé simu nomeasaun nu’udar vigáriu parokiál Parókia Nosa Señora Rozáriu Fátima, iha Ainaro. Iha fulan-dezembru tinan 1995, hetan nomeasaun nu’udar vigáriu episkopál ba asuntu pastorál sira dioseze Dili nian.

Iha loron 30 fulan-novembru tinan 1996, Papa João Paulo II nomeia nia nu’udar Administradór Apostóliku Baucau no Bispu Septimunicia. Dom Basílio simu pose iha Dioseze Baucau iha loron 19 fulan-marsu tinan 1997, iha festa Saun José. Iha serimónia ne’e, Núnsiu Apostóliku iha Jakarta, monseñór Pietro Sambi mós akompaña nia.

Tuir fali, nia nomeia nu’udar Administradór Apostóliku Dioseze Dili nian, kargu ne’ebé nia okupa entre loron 26 fulan-novembru tinan 2002 to’o loron 27 fulan-fevereiru tinan 2004.

Iha loron 6 fulan-marsu tinan 2004, Dom Basílio simu nomeasaun nu’udar Bispu Dioseze Baucau, husi Papa João Paulo II.

Iha loron 7 fulan-dezembru tinan 1999, D. Basílio do Nascimento simu distinsaun grau de Grã-Krús Ordem Liberdade, husi Portugál.

Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, hodi Konsellu Ministrus no Governu hotu nia naran, manifesta katak “ita konsagra ita nia hanoin sira no orasaun iha tempu susar no tempu sofrimentu ida-ne’e no ita hakarak hato’o ita nia sentidas kondolénsias, ne’ebé kle’an tebes ba família tomak husi estimadu D. Basílio do Nascimento, ba katóliku sira no ba povu timoroan hotu”. REMATA

 

   Ba leten