Governu Timor-Leste

Husi loron 30 fulan-setembru to’o loron 23 fulan-outubru tinan 2021, membru Governu Konstitusionál VIII partisipa iha kampaña intensiva kona-ba vasinasaun kontra COVID-19.

Objetivu hosi kampaña ida-ne’e maka atu hasa’e persentajen populasaun ne’ebé simu ona vasina iha país laran tomak. Tuir dadus ne’ebé fó-sai iha loron 29 fulan-setembru, iha país laran 58,7% husi populasaun ho idade 18 ba leten simu ona vasina doze dahuluk no 36,1% maka simu ona doze rua ne’e. Iha munisípiu hitu liu husi metade populasaun adulta maka seidauk simu vasina.

Iha munisípiu Aileu, rejista iha loron 29 fulan-setembru persentajen 48,5% husi populasaun adulta maka pelumenus simu ona vasina doze dahuluk nian , Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, sei bá iha Postu Administrativu Aileu Vila no Lekidoe, Sekretáriu Estadu Terras no Propriedades, Mário Ximenes, iha Postu Administrativu Remexiu no Sekretáriu Estadu Arte no Kultura, Teófilo Caldas, iha Postu Administrativu Laulara.

Iha Ainaro, ne’ebé molok hahú kampaña ida-ne’e populasaun adulta ho persentajen 37,5% simu ona vasina doze dahuluk, sei marka prezensa husi Sekretáriu Estadu ba Assuntus Kombatentes Libertasaun Nasionál, Gil da Costa Monteiro ‘Oan Soru’ , iha Postu Administrativu Ainaro, Sekretáriu Estadu Formasaun Profisionál no Empregu, Alarico do Rosário, iha Hato-Udo no Maubisse hosi Sekretáriu Estadu Peskas, Elídio de Araújo.

Iha Baukau, iha ne’ebé pelumenus 54,9% husi populasaun maka simu ona doze dahuluk, Ministru Turizmu, Komérsiu no Indústria, José Lucas do Carmo da Silva, sei bá iha Postu Administrativu Baukau no Vemasi, Ministru Petróleu no Minerais, Víctor da Conceição Soares, iha Kelikai no Laga. Vise-Ministru Obras Públikas, Nicolau Lino Freitas Belo no Vise-Ministru Administrasaun Estatál, Lino de Jesus Torrezão, iha Venilale no Baguia.

Munisípiu Bobonaru, ne’ebé rejista ona iha loron 29 fulan-setembru, persentajen ba vasinasaun hamutuk 42,3%, konta ho prezensa hosi Ministru Prezidénsia Konsellu Ministrus, Fidelis Manuel Leite Magalhães, iha Maliana no Lolotoe.  Ministru Edukasaun , Juventude no Desportu, Armindo Maia  sei bá iha Postu Administrativu Bobonaru no Ministru Ensinu Superiór, Siénsia no Kultura, Longuinho dos Santos iha Kailaku. Ministru Agrikultura no Peskas, Pedro dos Reis, sei bá iha Atabae no Balibo.

Iha Díli, Munisípiu ho persentajen ba vasinasaun bo’ot liu, ne’ebé rejista ho 78,2% iha loron molok halo kampaña ida-ne’e, sei konta ho partisipasaun hosi Vise-Primeiru-Ministrus, Armanda Berta dos Santos no José Maria dos Reis, iha Postu Administrativu Cristo Rei no Dom Aleixo. Ministru Rui Augusto Gomes, iha Metinaro no Vera Cruz, no Vise-Ministra Finansas, Sara Lobo Brites, iha Postu Administrativu Nain Feto no Ataúro.

Kampaña ba vasinasaun ne’e,  iha Ermera, munisípiu ho persentajen ba vasinasaun ne’ebé tun liu iha nível nasionál ( 32,8%), sei konta ho partisipasaun hosi Ministra Saúde, Odete Maria Freitas Belo, iha Postu Administrativu Ermera, no Ministru Administrasaun Estatál, Miguel Pereira de Carvalho, iha Postu Administrativu Letefoho no Hatólia. Vise-Ministrus Saúde no Agrikultura no Peskas, Bonifácio Mau Coli dos Reis no Abílio Xavier de Araújo, sei bá iha Atsabe no Railaco.

Munisípiu Covalima, ne’ebé rejista ona iha loron 29 fulan-setembru, persentajen ba vasinasaun 68,6% konta ho prezensa Ministrus Obras Públikas, Salvador Soares dos Reis Pires, iha Suai no iha Zumalai. Vise-Minstru Edukasaun,  Juventude no Desportu, António Guterres, sei bá iha Postu Administrativu Maucatar no Vise-Ministru Interiór, António Armindo sei bá iha Fatumea, Tilomar no Fatululik.

Iha Lautem, molok hahú kampaña ida-ne’e ho persentajen  hosi doze dahuluk  49,5% ba populasaun adulta,  sei konta ho prezensa hosi Vise-Ministru Komérsiu no Indústria, Domingos Lopes Antunes, iha Lautem no Tutuala, Sekretáriu Estadu ba Igualdade no Inkluzaun, Maria José da Fonseca Monteiro de Jesus, iha Lospalos no Sekretáriu Estadu ba Komunikasaun Sosiál, Merício Juvinal dos Reis “ Akara”, iha Iliomar no Luro.

Iha Likisa, iha ne’ebé ema ho 49,2% mak simu ona vasina doze dahuluk kontra Covid-19, sei hetan partisipasaun husi Ministru Defeza, Filomeno da Paixão de Jesus, iha Likisa no Maubara, no Sekretáriu Estadu Ambiente, Deométrio do Amaral de Carvalho, iha Bazartete.

Kampaña vasinasaun iha Manatutu populasaun adulta ne’ebé hetan primeira vasinasaun pelumenus 56,9% to’o loron 29 fulan-setembru, sei konta ho partisipasaun hosi Ministru Justisa, Manuel Cárceres da Costa, sei partisipa iha Postu Administrativu Manatutu no Laklo no Vise-Ministru Justisa, José Edmundo Caetano, iha Bariki-Natarbora no Laklubar. Iha Postu Administrativu Laleia no Soibada sei konta ho prezensa husi Sekretáriu Estadu Protesaun Sivil, Joaquim José Gusmão dos Reis Martins.

Iha Manufahi, populasaun adulta ne’ebé simu vasina doze dahuluk molok inísiu kampaña vasinasaun ida-ne’e ho 44,7%, sei konta mós ho prezensa hosi Ministru ba Asuntus Kombatentes Libertasaun Nasionál, Júlio Sarmento da Costa "Meta Mali" nian, iha Same no Turiskai. Vise-Ministra Solidariedade Sosiál, Signi Chandrawati Verdial, sei tama iha Fatuberlihu no Sekretáriu Estadu Juventude no Desportu, Abrão Saldanha, sei tama iha Alas.

Iha Rejiaun Administrativa Espesiál Oekusi Ambenu (RAEOA), populasaun ho tinan 18 liu mak hetan vasinasaun doze dahuluk ho persentajen pelumenus 71,2%, sei simu iha kampaña vasinasaun ida-ne’e Ministra Negósius Estranjeirus no Kooperasaun, Adaljiza Albertina Xavier Reis Magno, iha Pante Makásar, Vise-Ministru Negósius Estanjeirus no Kooperasaun, Julião da Silva, iha Pasabe, no mós Vise-Ministra Turizmu Komunitáriu no Kultura, Inácia da Conceição Teixeira, iha Oesilu no Nitibe.

Ikusliu, Munisípiu Vikeke,  ne’ebé rejista ona populasaun adulta ne’ebé simu vasina primeira doze pelumenus 67,2% iha loron 29 fulan-setembru, Ministru Koordenadór ba Asuntus Ekonómikus, Joaquim Amaral, sei partisipa iha kampaña vasinasaun iha WatuLari no Watukarabau no Ministru Transportes no Komunikasaun,  José Agustinho da Silva, iha Vikeke, Osú no Lakluta.