Governu Timor-Leste

Ohin, loron 14 fulan-juñu tinan 2021, lansamentu distribuisaun vasina Sinovac kontra COVID-19 nian hahú, iha Universidade Nasionál Timor Lorosa’e (UNTL).

Ministru Defeza, Filomeno da Paixão de Jesus, no Sekretáriu Estadu Juventude no Desportu, Abrão Saldanha, halo parte iha grupu husi sira ne’ebé maka simu uluk doze dahuluk Sinovac nian.

Vasina sira-ne’e halo parte husi pakote doze rihun atus ida ne’ebé oferese husi Repúblika Populár Xina no ne’ebé to’o ona iha Timor-Leste iha loron 5 fulan-juñu.

Grupu ne’ebé sai hanesan prioridade Sinovac nian maka foin-sa’e sira ho idade mínimu tinan 18, profesór no komunidade xineza iha Timor-Leste. 

Embaixadór Xina nian iha Timor-Leste, Xiao Jianguo, asegura katak vasina ida-ne’e “kumpre padraun internasionál seguransa, efikásia no fabriku nian” no “hetan ona aprovasaun husi Organizasaun Mundiál Saúde nian”.

Diplomata ne’e hatete mós katak “to’o fulan-maiu nia rohan, distribui ona Sinovac doze millaun 600 resin iha Xina no iha estranjeiru, iha país sira hanesan Brazíl, Indonézia, Paskitaun, Ungria, Méxiku, Tailándia no Turkia.

Doze dahuluk vasina Sinovac nian bele simu iha UNTL, Maternidade Fatumeta, iha Asosiasaun Xineza sira hanesan iha Hudilaran, Fatuhada no Aimutin, iha Institute of Business (IOB), Dili Institute of Technology (DIT) no Sekretaria Estadu Juventude no Desportu.

Serimónia lansamentu ne’e konta ho prezensa husi membru Governu balun, husi Prezidente Parlamentu Nasionál, membru diplomátiku no parseiru dezenvolvimentu nian sira.